गरीब विद्यार्थ्यांना मदतीचा हात

गरीब विद्यार्थ्यांना मदतीचा हात
डहाणूतील शाळेत दप्तर, स्वेटर व खाऊचे वाटप

कासा, ता. १६ (बातमीदार) : डहाणू तालुक्यातील जिल्हा परिषद उच्च प्राथमिक शाळा भराड व भराड नवा पाडा येथील १८१ आदिवासी व गरीब विद्यार्थ्यांना श्रीपाल कांकरिया ग्रुप, ठाणे-कळवा यांच्या वतीने शाळेचे दप्तर, स्वेटर व खाऊचे वाटप करण्यात आले.
कार्यक्रमात छाया प्रधान व दीप्ती पष्टे यांनी विद्यार्थ्यांना मार्गदर्शन करताना आई-वडिलांनंतर शिक्षक हे दुसरे गुरू असल्याचे सांगत देवाची प्रार्थना करावी, पुढील काळ आव्हानात्मक असल्याने गरिबी दूर करण्यासाठी मेहनत, अभ्यास व नियमित व्यायाम करण्याचा सल्ला दिला. निरोगी जीवनासाठी सेंद्रिय अन्नाचे सेवन करावे, मैदानी खेळ खेळावेत व आनंदी, तणावमुक्त जीवन जगावे, असे सांगितले.
कार्यक्रमाला उडान प्रतिष्ठानच्या सदस्या अमृता शेट्टी, अमित पवार, गीता पवार, मोहन, शाळा व्यवस्थापन समितीचे अध्यक्ष सुदाम माळी, सदस्य संतोष शेलार, सदस्या रेखा भंडारी, रुपाली वावरे, शकुंतला पारधी, ग्रामस्थ सुरज वावरे तसेच दोन्ही शाळांतील शिक्षक दिलीप तुंबडा, नंदा सिसोदे, दीपिका वनगा व मोनिका वनगा उपस्थित होते. कार्यक्रमाचे प्रास्ताविक व आभार शिक्षक सिताराम पांडुरंग भोये यांनी मानले, तर सूत्रसंचलन ज्योती कानल यांनी केले.