तालयात्रा कार्यक्रमाने देवगंधर्व महोत्सवाची सांगता

देवगंधर्व महोत्सवाची सांगता
‘संगीत ययाती देवयानी’ नाटकाला प्रेक्षकांचा प्रतिसाद
कल्याण, ता. १६ (वार्ताहर) : देवगंधर्व महोत्सवात कल्याण गायन समाज प्रस्तुत ‘संगीत ययाती देवयानी’ या नाटकाचा प्रयोग सादर करण्यात आला. हेमंत कर्णिक यांच्या दिग्दर्शनाखाली कल्याण गायन समाजाच्या तरुण चमूने या नाटकाचे सादरीकरण केले. या नाटकाला रसिक प्रेक्षकांचा टाळ्यांच्या कडकडाट मोठा प्रतिसाद मिळाला. या प्रयोगाचे वैशिष्ट्य म्हणजे कल्याण गायन समाजाच्या शतकमहोत्सवी वर्षाचा व नाटकाच्या कथानकाचा उल्लेख करणारी नांदी खास या प्रयोगासाठी करण्यात आली होती.
देवगंधर्व महोत्सवाच्या शेवटच्या सत्रात प्रतिवर्षाप्रमाणे स्मरणिकेचे प्रकाशन झाले. ‘शतायुषी गायन समाज’ या विषयाला समर्पित अशा या स्मरणिकेचे प्रकाशन ज्येष्ठ तबलावादक तालयोगी पं. सुरेश तळवलकर यांच्या हस्ते झाले. कल्याण गायन समाजाचे अध्यक्ष डॉ. संदीप जाधव, महोत्सवाचे अध्यक्ष सीताराम कुंटे, उपाध्यक्ष डॉ. नंजप्पा व माधव जोशी, विश्वस्त ॲड. जल्लावार, कल्याण गायन समाजाचे प्रशांत दांडेकर, राम जोशी, स्वप्नील भाटे, स्मरणिकेचे संपादक अतुल वझे व स्मरणिकेचे मुद्रक आशिष देवधर हे या वेळी उपस्थित होते. महोत्सवाच्या सर्व सत्रातील रंगमंच नेपथ्याची जबाबदारी राम जोशी यांनी तर प्रसिद्धीची बाजू ॲड. निखिल बुधकर, प्रशांत दांडेकर, मोहन उपासनी यांनी सांभाळली. कार्यक्रमांच्या सर्व सत्रांचे सूत्र संचालन श्रीराम केळकर यांनी केले.

रसिकांना खिळवून ठेवले
तालयोगी यांच्या संकल्पनेतून साकार झालेला तालयात्रा हा कार्यक्रम यानंतर सादर झाला. गायन, वादन, नृत्य या संगीताच्या तिन्ही अंगांचा समावेश असलेल्या या कार्यक्रमाने सुरुवातीपासून रसिकांना खिळवून ठेवले. या कार्यक्रमात सत्यजीत तळवलकर यांची अचानक झालेली उपस्थिती हा रसिकांसाठी एक सुखद धक्का होता. पार्श्वभूमीवर चाललेला शाम कल्याणमधील तराणा आणि त्यावर सत्यजीत यांची पढंत श्रोत्यांना विशेष अनुभूती देऊन गेली. कार्यक्रमात शेवटी मल्हार रागातली शंकर अभ्यंकर यांची रचना सादर झाली आणि यावर्षीच्या महोत्सवाची सांगता झाली.