शाश्वत ठाण्यासाठी विचारमंथन

शाश्वत ठाण्यासाठी विचारमंथन
‘ठाणे व्हिजन २०४७’ परिसंवादाचे आयोजन

ठाणे, ता. १६ (बातमीदार) : सतीश प्रधान महाविद्यालयाचे संस्थापक, ठाण्याच्या नगरविकास, क्रीडा, कला व संस्कृतिक क्षेत्रावर अमिट ठसा उमटवणारे सतीश प्रधान यांचे गेल्या वर्षी २९ डिसेंबरला निधन झाले. त्यांच्या पवित्र स्मृतीला अभिवादन करण्यासाठी सतीश प्रधान महाविद्यालयातर्फे ‘अक्षतांजली’ या विशेष उपक्रमाचे आयोजन करण्यात आले आहे. या अंतर्गत २९ नोव्हेंबर ते २९ डिसेंबरदरम्यान विविध कार्यक्रम राबविण्यात येत आहेत. या उपक्रमाचाच एक भाग म्हणून गुरुवारी (ता. १८) ‘ठाणे व्हिजन २०४७ : भूतकाळ, वर्तमान आणि भविष्य’ या विषयावर एक महत्त्वपूर्ण परिसंवाद आयोजित केला आहे. या परिसंवादाचा उद्देश ठाण्याच्या जडणघडणीत सतीश प्रधान यांच्या शहरी नियोजनातील योगदानाचा आढावा घेत, शहराच्या शाश्वत विकासासाठी पायाभूत सुविधांची भूतकाळातील, वर्तमानातील व भविष्यातील स्थिती अभ्यासणे हा आहे.

परिसंवादात एसएमसी इन्फ्राट्रचरचे सुहास मेहता, ज्येष्ठ पत्रकार कुमार केतकर, शहरी नियोजनकार सुलक्षणा महाजन यांच्यासह अभियंते, नियोजन अधिकारी व प्रशासकीय अधिकारी सहभागी होणार आहेत. या माध्यमातून नागरी नियोजन, वाहतूक, पर्यावरण संवर्धन व नागरिक-केंद्रित प्रशासनाबाबत ठोस शिफारसी राज्य व स्थानिक स्वराज्य संस्थांना सादर केल्या जाणार आहेत. हीच सतीश प्रधान यांना खरी आदरांजली ठरेल.