ऑर्किड स्कूलमध्ये विज्ञान प्रदर्शन उत्साहात

ऑर्किड स्कूलमध्ये विज्ञान प्रदर्शन उत्साहात
कर्जत, ता. १६ (बातमीदार): कर्जत तालुक्यातील ऑर्किड ग्लोबल स्कूल अँड कॉलेज येथे शनिवार, १३ डिसेंबर रोजी विज्ञान प्रदर्शन दिन मोठ्या उत्साहात साजरा करण्यात आला. विद्यार्थ्यांमधील वैज्ञानिक दृष्टिकोन विकसित करणे, संशोधनाची आवड निर्माण करणे आणि नवकल्पनांना प्रोत्साहन देणे हा या कार्यक्रमाचा मुख्य उद्देश होता.
या विज्ञान प्रदर्शनाचे आयोजन शाळा व महाविद्यालयाच्या मुख्याध्यापिका सोनल मिश्रा यांच्या मार्गदर्शनाखाली करण्यात आले. कार्यक्रमास साखरे एज्युकेशन सोसायटीचे अध्यक्ष सुनील साखरे व सचिव राहुल साखरे यांची प्रमुख उपस्थिती लाभली.
विज्ञान प्रदर्शनात विद्यार्थ्यांनी विविध वैज्ञानिक प्रकल्प, प्रयोग, मॉडेल्स तसेच नाविन्यपूर्ण संकल्पना सादर केल्या. पर्यावरण, तंत्रज्ञान, ऊर्जा, आरोग्य, गणित आणि दैनंदिन जीवनाशी निगडित विज्ञान विषयांवरील प्रकल्पांनी उपस्थितांचे विशेष लक्ष वेधून घेतले. पाहुण्यांनी विद्यार्थ्यांच्या कल्पकतेचे कौतुक करत त्यांना भविष्यात संशोधन व विज्ञान क्षेत्रात करिअर घडविण्यासाठी मार्गदर्शन केले.
या कार्यक्रमास प्रमुख पाहुणे म्हणून अनिल गलगले (विज्ञान मंडळ अध्यक्ष व गौळवाडी माध्यमिक विद्यालयाचे मुख्याध्यापक), सिद्धार्थ प्रधान (भाऊसाहेब राऊत विद्या मंदिर, कशेळे – मुख्याध्यापक) तसेच अशोक शहा (समावेशी पाठशाळा, कशेळे – दिव्यांग शाळा) उपस्थित होते.