मी वसईकर अभियान चळवळीचे नेते मिलिंद खानोलकर यांना नोटीस!

अनधिकृत बांधकाम काढून टाका, अन्यथा कारवाई
मी वसईकर अभियान चळवळीचे नेते मिलिंद खानोलकर यांना पालिकेची नोटीस
विरार, ता. १६ (बातमीदार) ः वसई-विरार शहर महापालिकेच्या प्रभाग समिती आय क्षेत्रातील भास्करआळी येथे बेकायदा बांधकाम केल्याच्या प्रकरणी मी वसईकर अभियानाचे प्रणेते मिलिंद खानोलकर यांना कारवाईची नोटीस बजावली आहे. प्रभाग समिती कार्यालयाचे सहाय्यक आयुक्त शशिकांत पाटील यांनी ही नोटीस बजावली आहे.
मिलिंद खानोलकर यांच्या अनधिकृत बांधकामाबाबत पाच मे रोजी कार्यालयाकडे तक्रार अर्ज दाखल आला होता. या अनुषंगाने प्रत्यक्ष पहाणी करुन पालिकेने खानोलकर यांना नोटीस बजावली होती. यानंतर, १६ सप्टेंबर रोजी आयोजित सुनावणीत धावली या मिळकतीवर नगररचना विभागाने कोणतीही बांधकाम परवानगी दिली नसल्याचे स्पष्ट झाले. त्यामुळे हे बांधकाम अनधिकृत असल्याचा निर्णय घेण्यात आला आहे. यामुळे खानोलकर यांनी हे अनधिकृत बांधकाम पुढील १५ दिवसांत स्वतःहून काढून टाकावे. अन्यथा, पालिकेमार्फत ते निष्कासित करण्यात येईल व त्याकामी आलेला खर्चाची रक्कम खानोलकर यांच्याकडून वसूल करण्यात येईल, असा इशारा पालिकेने दिला आहे.

मिलिंद खानोलकर यांची प्रतिक्रिया
या संदर्भात मिलिंद खानोलकर यांच्याकडे विचारणा केली असता, त्यांनी महापालिकेकडून नोटीस मिळाल्याचे मान्य केले. नमूद जागा ही आमची वडिलोपार्जित स्थावर मालमत्ता आहे. या ठिकाणी आम्ही इमारती बांधलेल्या नाहीत, थोडेफार पत्र्याचे कच्चे बांधकाम आहे. आम्ही ते बांधकाम स्वतः पाडून घेऊ, असे त्यांनी सांगितले.