डहाणू–तलासरीत नॉन बँकिंग कंपन्यांच्या कथित फसवणुकीविरोधात किसान सभेचा मोर्चा

डहाणू-तलासरीत किसान सभेचा मोर्चा
कासा, ता. १६ (बातमीदार) ः डहाणू-तलासरी परिसरात नॉन बँकिंग कंपन्यांच्या नावाखाली नागरिकांची कोट्यवधींची आर्थिक फसवणूक झाल्याच्या तक्रारी वाढत आहेत. या कथित घोटाळ्याविरोधात शनिवारी (ता. १३) किसान सभेच्या वतीने डहाणू पोलिस ठाण्यावर मोर्चा काढण्यात आला. दोषींवर तत्काळ गुन्हे दाखल करण्याची मागणी करण्यात आली असून, पोलिसांनी चार ते पाच दिवसांत कारवाईचे आश्वासन दिले आहे.
मातृभूमी रिअल टच डेव्हलपमेंट लिमिटेडसह नॉन बँकिंग क्षेत्रातील विविध कंपन्यांकडून डहाणू व तलासरी तालुक्यातील अनेक नागरिकांची मोठ्या प्रमाणावर आर्थिक फसवणूक झाल्याच्या तक्रारी किसान सभेचे पालघर जिल्हाध्यक्ष चंद्रकांत घोरखना यांच्याकडे प्राप्त झाल्या होत्या. त्यानंतर संबंधित कंपनी आणि टीम प्रमुखांवर तत्काळ गुन्हे दाखल करण्यासाठी ७ डिसेंबर रोजी डहाणू पोलिस ठाण्यात निवेदन देण्यात आले होते. त्वरित कारवाई न झाल्यास ठिय्या आंदोलनाचा इशाराही देण्यात आला होता. यानुसार शनिवारी शेकडो नागरिकांसह मोर्चा काढण्यात आला.
मोर्चादरम्यान किसान सभेच्या शिष्टमंडळाने डहाणू पोलिस ठाण्याचे पोलिस निरीक्षक किरण पवार यांच्याशी सविस्तर चर्चा केली. या वेळी संबंधित कंपनीचे टीम लीडर व शाखा व्यवस्थापक यांच्यावर तत्काळ गुन्हे दाखल करण्याची मागणी करण्यात आली. पोलिस निरीक्षक किरण पवार यांनी योग्य ती चौकशी करण्यात येईल आणि चौकशीअंती चार ते पाच दिवसांत संबंधितांवर कायदेशीर कारवाई करून गुन्हे दाखल केले जातील, असे आश्वासन दिले.
आमदार विनोद निकोले यांच्या अध्यक्षतेखाली चंद्रकांत घोरखना यांनी मोर्चाचे नेतृत्व केले. या वेळी तालुका सचिव रडका कलांगडा, किरण गहला, जनवादी महिला संघटनेच्या लाहनी दौडा, कमलेश राबड, राजेश दळवी यांच्यासह नागरिक मोठ्या संख्येने उपस्थित होते. दोषींवर कठोर कारवाई न झाल्यास आंदोलन अधिक तीव्र करण्यात येईल, असा इशाराही किसान सभेच्या वतीने देण्यात आला.