वाहनाच्या धडकेत तरुणीचा मृत्यू

वाहनाच्या धडकेत तरुणीचा मृत्यू
पनवेल, ता. १६ (वार्ताहर) : दुचाकीत पेट्रोल भरण्यासाठी पंपावर गेलेल्या दोन मैत्रिणींना वाहनाने धडक दिल्याने एका मुलीचा मृत्यू झाला आहे. पनवेलमधील कुंडेवहाळ येथे शनिवारी दुपारी ही घटना घडली. या दुर्घटनेत तिची मैत्रीण गंभीर जखमी असून, वाहनचालक फरार आहे.
पनवेलच्या कुंडेवहाळ येथील पाटणोळी येथे राहणारी साक्षी पाटील तिची मैत्रीण कृतीका भगत सोबत स्कुटीमध्ये पेट्रोल नसल्याने भरण्यासाठी पेट्रोल पंपावर गेल्या होत्या. या वेळी जेएनपीटीकडून पळस्पेकडे जाणाऱ्या सेवा रस्त्यावर पंकज पार्किंगलगतच्या पुलाखाली भरधाव वेगातील वाहनाने त्यांना धडक दिली. या अपघातात साक्षीचा जागीच मृत्यू झाला, तर कृतीका गंभीर जखमी झाली. तिला रुग्णालयात दाखल करण्यात आले. घटनेनंतर वाहनचालक घटनास्थळावरुन फरार झाला होता. त्याच्याविरोधात पनवेल शहर पोलिस ठाण्यात गुन्हा दाखल करण्यात आला आहे.