शिस्त, शैक्षणिक सुविधांमुळे विद्यार्थ्यांची गुणवत्ता वाढीस : उपाध्यक्षा दीपिका पाटील

शिस्त, शैक्षणिक सुविधांमुळे विद्यार्थ्यांची गुणवत्ता वाढीस : उपाध्यक्षा दीपिका पाटील
पेण, ता. १६ (वार्ताहर) : सार्वजनिक विद्यामंदिर अँड ज्युनियर कॉलेज, पेण या विद्यालयातील शिस्तबद्ध वातावरण आणि उपलब्ध शैक्षणिक सुविधांमुळे गेल्या काही वर्षांपासून विद्यार्थ्यांची शैक्षणिक गुणवत्ता लक्षणीयरीत्या वाढली असल्याचे प्रतिपादन विद्यालयाच्या उपाध्यक्षा दीपिका पाटील यांनी केले. त्या महाराष्ट्र शिक्षण संस्था संचालित सार्वजनिक विद्यामंदिर ॲन्ड ज्युनियर कॉलेज, पेण येथे आयोजित वार्षिक स्नेहसंमेलन व पारितोषिक वितरण समारंभात बोलत होत्या.
आपल्या भाषणात उपाध्यक्षा दीपिका पाटील यांनी सांगितले की, केवळ अभ्यासक्रमापुरते शिक्षण न देता विद्यार्थ्यांच्या सर्वांगीण विकासावर भर दिला जात आहे. शाळेतील शिस्त, अद्ययावत शैक्षणिक सुविधा आणि शिक्षकांचे सातत्यपूर्ण मार्गदर्शन यामुळे विद्यार्थ्यांमध्ये आत्मविश्वास वाढत असून त्याचा सकारात्मक परिणाम निकालांवरही दिसून येत आहे. कार्यक्रमाच्या प्रास्ताविकात प्राचार्य एस. एच. नाईक यांनी वर्षभर विद्यार्थ्यांच्या कला-गुणांना वाव देणारा हा स्नेहसंमेलनाचा सोहळा असल्याचे नमूद केले. या काळात विद्यार्थ्यांना थोडी सूट दिली जात असली तरी संस्थेची शिस्त, शैक्षणिक सुविधा, शिक्षकांची अहोरात्र मेहनत तसेच संस्थेचे अध्यक्ष व सदस्यांकडून मिळणारी मोलाची साथ अत्यंत महत्त्वाची असल्याचे त्यांनी स्पष्ट केले. या कार्यक्रमादरम्यान विद्यार्थ्यांनी रांगोळी व चित्रकला प्रदर्शनाच्या माध्यमातून चालू घडामोडी, महिला सुरक्षा, प्लॅस्टिक बंदी जनजागृती, महापुरुषांचे विचार, विविधतेत एकता, धार्मिक संस्कृती व पर्यावरण संवर्धन अशा विविध विषयांचे प्रभावी सादरीकरण केले. तसेच मान्यवरांच्या हस्ते ‘ज्ञानप्रभा’ या स्मरणिकेचे प्रकाशन करण्यात आले. कार्यक्रमाने विद्यार्थ्यांच्या कलागुणांना व्यासपीठ देत शैक्षणिक व सांस्कृतिक वातावरण अधिक समृद्ध केले.