बोर अॅपलच्या बाजारात चलती

ॲपल बोराची बाजारात चलती
हंगामाला सुरुवात, मार्गशीर्षमुळे मागणीत वाढ
जुईनगर, ता. १६ (बातमीदार) : नवी मुंबई बाजार समितीमधील फळ बाजारात ॲपल बोराच्या मागणी वाढली आहे. विशेष म्हणजे, सप्टेंबर ते डिसेंबर कालावधीत हंगाम असल्याने बाजारात आवक वाढली आहे.
सोलापूर, पंढरपूर येथून बोरांची आवक होते. सध्या दोन टेम्पो मालाची आवक मुंबई बाजार समिती फळ बाजारात होत आहे. त्यात सरासरी दोन हजार खोके माल बाजारात विक्रीसाठी येतो. तर त्यातील ५० टक्क्यांहून अधिक माल निर्यातदार खरेदी होत आहे. मागणीच्या तुलनेत आवक कमी असल्याने दुपारपर्यंत सर्वच मालाची विक्री होत असल्याचे व्यापारी सांगत आहेत. घाऊक बाजारात १० किलो वजनाच्या खोक्यासाठी ३०० ते ६०० रुपये दर मिळत आहे. तर किरकोळ बाजारात ८० ते १२० रुपये प्रतिकिलो दराने विक्री होत आहे.
-------------------------------------
विविध प्रकार दाखल
ॲपल बोरामध्ये काश्मिरी, चमेली, बॉल सुंदरी, सुंदरी असे प्रकार आहेत. त्यात लहान-मोठ्या आकाराची बोरे विक्रीसाठी बाजारात येत आहेत. हिरव्या रंगाच्या बोरांना कमी तर लाल बोरांना अधिक दर असल्याचे व्यापारी सांगतात.