६२ वर्षीय चोरटा अटकेत

६२ वर्षीय चोरटा अटकेत
नौपाडा पोलिसांची कारवाई
ठाणे, ता. १६ : दुकानातील ड्रील मशीन, ग्राइंडर, कटर आणि ब्लेड यांसारख्या महागड्या औद्योगिक साहित्याची चोरी करणाऱ्या एका सराईत चोरट्याला नौपाडा पोलिसांनी अटक केली आहे. श्यामसुंदर घाडी (६२, रा. भांडुप) असे या आरोपीचे नाव असून त्याच्याकडून सुमारे अडीच लाख रुपयांचा मुद्देमाल हस्तगत करण्यात आला आहे.

पाचपाखाडी येथील व्यापारी शिवप्रकाश केसरी यांचे नौपाडा परिसरात ‘सुपर सेल्स अँड सर्व्हिस’ नावाचे दुकान आहे. शनिवारी (ता. १३) त्यांच्या दुकानातून पॉवर टूल्स आणि इतर इंडस्ट्रियल साहित्याची चोरी झाली होती. याप्रकरणी केसरी यांनी नौपाडा पोलिस ठाण्यात तक्रार दाखल केली होती. वरिष्ठ पोलिस निरीक्षक अभय महाजन यांच्या मार्गदर्शनाखाली सहाय्यक पोलिस निरीक्षक मंगेश भांगे या गुन्ह्याचा तपास करत होते. तपासादरम्यान, आरोपी श्यामसुंदर घाडी हा चोरीचा माल विकण्यासाठी नौपाडा येथील एल.बी.एस. रोडवर येणार असल्याची खात्रीशीर माहिती पोलिसांना मिळाली. पोलिसांनी सापळा रचून त्याला ताब्यात घेतले.

पोलिसांनी आरोपीकडून ड्रील मशीन, ग्राइंडर, कटर, ब्लेड आणि इतर इंडस्ट्रियल टूल्स साहित्य जप्त केले आहे. याची एकूण किंमत दोन लाख ४३ हजार रुपये इतकी आहे. आरोपीला न्यायालयात हजर केले असता, त्याला १७ डिसेंबरपर्यंत पोलिस कोठडी सुनावण्यात आली आहे. या गुन्ह्यात त्याचे आणखी कुणी साथीदार आहेत का, याचा तपास पोलिस करीत आहेत.