नवी मुंबई महापालिकेची अंतिम मतदार यादी जाहीर

नवी मुंबई महापालिकेची अंतिम मतदार यादी जाहीर
निवडणूक तयारीतील महत्त्वाचा टप्पा पूर्ण
वाशी, ता. १६ (बातमीदार) : नवी मुंबई महापालिका सार्वत्रिक निवडणूक–२०२५ च्या पार्श्वभूमीवर प्रभागनिहाय अंतिम मतदार यादी सोमवार, ता. १५ डिसेंबर रोजी अधिकृतरीत्या जाहीर करण्यात आली आहे. राज्य निवडणूक आयोग, महाराष्ट्र यांच्या मार्गदर्शक सूचनांनुसार ही संपूर्ण प्रक्रिया पूर्ण करण्यात आली असून, यामुळे महापालिका निवडणुकीच्या तयारीतील एक अत्यंत महत्त्वाचा टप्पा पार पडला आहे.
जाहीर करण्यात आलेल्या अंतिम मतदार यादीनुसार नवी मुंबई महापालिका क्षेत्रात एकूण ९ लाख ४८ हजार ४६० मतदार नोंदणीकृत आहेत. यामध्ये ५ लाख १६ हजार २६७ पुरुष, ४ लाख ३२ हजार ४० महिला तसेच १५३ इतर मतदारांचा समावेश आहे. ही मतदार संख्या शहरातील एकूण २८ प्रभागांमध्ये विभागण्यात आली असून, प्रत्येक प्रभागातील स्वतंत्र मतदारसंख्या आयोगाकडून जाहीर करण्यात आली आहे.
प्रभागनिहाय आकडेवारीनुसार प्रभाग क्रमांक १ हा नवी मुंबईतील सर्वात मोठा प्रभाग ठरला असून, या प्रभागात ४० हजार १९८ मतदार आहेत. तर प्रभाग क्रमांक २८ हा सर्वात छोटा प्रभाग असून, येथे २६ हजार १२५ मतदार नोंदणीकृत आहेत. काही प्रभागांमध्ये ४० हजारांहून अधिक मतदारसंख्या आहे, तर काही प्रभागांमध्ये ही संख्या २६ ते ३० हजारांच्या दरम्यान आहे. अंतिम मतदार यादीनुसार पुरुष व महिला मतदारांचे प्रमाण तुलनेने समतोल असल्याचे स्पष्ट होत आहे. ही अंतिम मतदार यादी नवी मुंबई महापालिका मुख्यालय, संबंधित विभाग कार्यालयांच्या नोटीस बोर्डांवर तसेच महापालिकेच्या अधिकृत संकेतस्थळावर उपलब्ध करून देण्यात आली आहे. नागरिकांच्या सोयीसाठी महापालिकेच्या अधिकृत सोशल मीडिया माध्यमांवरही ही यादी प्रसिद्ध करण्यात आली आहे.
.............
मतदारांना आवाहन
दरम्यान, मतदारांनी आपले नाव अंतिम मतदार यादीत आहे की नाही, याची खात्री करून घ्यावी आणि येत्या निवडणुकीत आपला मतदानाचा हक्क बजावावा, असे आवाहन प्रशासनाच्या वतीने करण्यात आले आहे. अंतिम मतदार यादी जाहीर होताच नवी मुंबईतील राजकीय वातावरण अधिकच तापू लागले असून, इच्छुक उमेदवार व पक्षांच्या हालचालींनाही वेग आला आहे.