वाशी येथे माजी विद्यार्थी मेळावा उत्साहात

वाशी येथे माजी विद्यार्थी मेळावा उत्साहात
रोहा, ता. १६ (बातमीदार): शाळेच्या आठवणींना उजाळा देत आणि विकासासाठी हातभार लावण्याच्या उद्देशाने वाशी येथील जिल्हा परिषद शाळेत माजी विद्यार्थ्यांचा स्नेहमेळावा तसेच शाळेचा वर्धापनदिन सोहळा रविवार (ता. १४) रोजी उत्साहात पार पडला. या मेळाव्यास माजी विद्यार्थी सुरेश मगर, अरविंद मगर यांच्यासह माजी विद्यार्थी संघाचे सर्व सदस्य, ज्येष्ठ ग्रामस्थ, शाळा व्यवस्थापन समितीचे पदाधिकारी व सदस्य तसेच पालक मोठ्या संख्येने उपस्थित होते. कार्यक्रमात माजी विद्यार्थ्यांचे स्वागत, विविध कलागुणांचे सादरीकरण, मनोगत, शाळेच्या विकासासाठी सहभागाबाबत चर्चा तसेच अल्पोपहार असे उपक्रम राबविण्यात आले. माजी विद्यार्थ्यांनी शाळेच्या प्रगतीसाठी विविध प्रकारे सक्रिय सहभाग घ्यावा, असे आवाहन मुख्याध्यापिका वैशाली सलागरे यांनी केले. हा कार्यक्रम यशस्वी करण्यासाठी सर्व पालक, विद्यार्थी तसेच ज्येष्ठ शिक्षिका कोठेकर यांनी विशेष मेहनत घेतली.