हिवाळ्यात संसर्गजन्य आजारांचा धोका

हिवाळ्यात संसर्गजन्य आजारांचा धोका
खबरदारी घेण्याचे डॉक्टरांचे आवाहन
ठाणे शहर, ता. १६ (बातमीदार) : जिल्ह्याचा पारा १८-१९ अंशांपर्यंत खाली आल्याने हवेत आल्हाददायी गारवा पसरला आहे; मात्र या गारव्यासोबतच स्वाइन फ्ल्यू, सर्दी, खोकला आणि श्वसनाचे आजार बळावू लागले आहेत. ठाण्यातील शासकीय व खासगी रुग्णालयांमध्ये रुग्णांची संख्या वाढल्याने आरोग्य विभागाने नागरिकांना ‘कोरोना’ काळात घेतली होती, तशीच खबरदारी घेण्याचे आवाहन केले आहे.

ठाण्यातील विठ्ठल सायन्ना जिल्हा सामान्य रुग्णालयात बाह्यरुग्ण विभागात सध्या ३० ते ३५ टक्के वाढ झाली आहे. प्रामुख्याने धुके आणि प्रदूषणाचे मिश्रण असलेल्या हवेमुळे तक्रारी वाढल्या आहेत. जिल्ह्यातील ग्रामीण व आदिवासी भागात रात्रीचा गारवा अधिक असल्याने ज्येष्ठ नागरिकांमध्ये रक्तदाब आणि सांधेदुखीचे प्रमाण वाढले आहे. तसेच लहान मुलांना संसर्गजन्य आजारांची लागण लवकर होत असल्याने त्यांना उबदार कपडे घालण्याचा सल्ला डॉक्टरांनी दिला आहे.

खबरदारीचे उपाय
आरोग्य विभागाने नागरिकांना खालील नियमांचे पालन करण्यास सांगितले आहे:
१. मास्कचा वापर : सकाळी धुके असताना बाहेर पडताना मास्क वापरावा, जेणेकरून प्रदूषित हवा फुप्फुसात जाणार नाही.
२. आहार व पाणी : गरम आणि पौष्टिक आहार घ्यावा. हवा कोरडी असल्याने पुरेसे पाणी पिणे आवश्यक आहे.
३. थंड वाऱ्यापासून बचाव : थेट थंड वाऱ्याचा संपर्क टाळण्यासाठी कानटोपी आणि स्वेटरचा वापर करावा.
४. स्वच्छता : हात वारंवार धुणे आणि गर्दीच्या ठिकाणी जाणे टाळावे.

आजाराचे प्रकार आणि लक्षणे
श्वसन विकार : सर्दी, खोकला, घसा दुखणे, नाक वाहणे आणि दम्याचा त्रास.
संसर्गजन्य आजार : ताप, डोकेदुखी आणि व्हायरल इन्फेक्शन.
त्वचेचे आजार : त्वचा कोरडी पडणे आणि खाज येणे.

कोरोना महामारीने आपल्याला आरोग्याची काळजी घेण्याच्या चांगल्या सवयी लावल्या आहेत, त्याचे पालन आताही करणे गरजेचे आहे. हिवाळ्यात संसर्ग पसरण्याची शक्यता अधिक असल्याने नागरिकांनी स्वतःहून औषधे न घेता डॉक्टरांच्या सल्ल्यानेच उपचार घ्यावेत.
- डॉ. कैलास पवार, जिल्हा शल्यचिकित्सक, ठाणे