बांधण नाक्यावर गतिरोधकांची मागणी

बांधण नाक्यावर गतिरोधकांची मागणी
वर्दळीमुळे अपघाताचा धोका वाढला
पोयनाड, ता. १६ (बातमीदार) : अलिबाग तालुका येथील बांधण नाका हा अत्यंत वर्दळीचा परिसर बनला असून, येथूनच पेझारी-नागोठणे राज्यमार्ग जातो. त्यामुळे दिवसभर वाहनांची मोठी ये-जा सुरू असते, मात्र पेझारी व नागोठणे या दोन्ही दिशेला गतिरोधक नसल्याने अपघात होण्याची शक्यता वाढली आहे. वाहनांची वाढती वर्दळ आणि अपघाताचा धोका लक्षात घेता अलिबाग तालुक्यातील बांधण नाक्यावर तातडीने गतिरोधक बसवावेत, अशी मागणी स्थानिक नागरिकांकडून होत आहे.
बांधण नाक्यावरून नागोठणे, बांधण गाव, वाघोडे, ताडवागळे, पेझारी तसेच पोयनाड आठवडा बाजाराकडे जाणारे रस्ते वेगवेगळ्या दिशांनी फुटतात. या ठिकाणी दुकाने व दवाखाना असल्याने पादचाऱ्यांची मोठ्या प्रमाणावर वर्दळ असते. विशेषतः सोमवारच्या पोयनाड आठवडा बाजाराच्या दिवशी आजूबाजूच्या गावांतील नागरिक मोठ्या संख्येने येथे येतात.
सध्या पोयनाड येथे एसटी बस थांबविण्यासाठी जागा उपलब्ध नसल्याने अलिबागहून पाली, नागोठणे, रोहा, सांबरी, शिहूकडे जाणाऱ्या एसटी बसेस पेझारी मार्गेच पुढे जातात. तसेच रिक्षाने प्रवास करणाऱ्या प्रवाशांची संख्याही मोठी आहे. कुसुंबळे व कुर्डुस भागाकडे जाणारे तसेच एसटीने ये-जा करणारे प्रवासी बांधण नाक्यावर मोठ्या संख्येने उतरतात.
या ठिकाणी दोन्ही बाजूंनी येणाऱ्या वाहनांचा वेग कमी होत नसल्याने पादचाऱ्यांना वाहनांचा अंदाज येत नाही. विशेषतः सायंकाळच्या वेळेस अपघात होण्याची शक्यता अधिक असल्याचे नागरिकांचे म्हणणे आहे. त्यामुळे बांधण नाका येथे पेझारी व नागोठणे या दोन्ही दिशेला तातडीने गतिरोधक बसवावेत, अशी जोरदार मागणी स्थानिक नागरिकांकडून करण्यात येत आहे.