आरपीआयच्या पदाधिकाऱ्यावर हल्ला

आरपीआयच्या पदाधिकाऱ्यावर हल्ला
दिघ्यातील घटना, दोघा हल्लेखोरांना पोलिसांकडून अटक
नवी मुंबई, ता. १६ (वार्ताहर) : दुचाकी अंगावर घातल्याच्या किरकोळ वादातून आरपीआयचे जिल्हा युवक सचिव बुद्धप्रकाश दिलपाकवर १० ते १२ हल्लेखोरांनी जीवघेणा हल्ला केला होता. या प्रकरणात रबाळे एमआयडीसी पोलिसांनी दोघांना अटक केली आहे.
दिघा येथील रामनगरमध्ये राहणारा आरपीआयचा कार्यकर्ता योगेश दारोळे रविवारी (ता. १४) मध्यरात्री घरासमोर उभा असताना दुचाकीस्वाराने त्याच्या अंगावर दुचाकी घातली होती. या वेळी गाडी हळू चालव, असे बोलल्याने दोघांमध्ये वाद झाला होता. या वादातून विशाल मोरेला मारण्यासाठी १० ते १२ जण आले होते. या वेळी आरपीआयचे जिल्हा युवक सचिव बुद्धप्रकाश दिलपाक यांनी विशालला समजावण्याचा प्रयत्न केला; पण त्यांच्यावरच कोयता, लोखंडी रॉडने हल्ला चढवला. या हल्ल्यात दिलपाक गंभीर जखमी आहेत. त्यांना रुग्णालयात दाखल करण्यात आले आहे.
--------------------------------------
तणावाचे वातावरण
- घटनेनंतर रबाळे पोलिसांनी विशाल मोरेसह १२ जणांविरोधात दंगल माजवणे, गंभीर दुखापतीसह मारहाण करणे, महाराष्ट्र पोलिस अधिनियमानुसार गुन्हा दाखल केला आहे. तर दोघांना अटक केली आहे. तसेच इतर साथीदारांचा शोध सुरू आहे.
- हल्लेखोर तोंडाला रुमाल बांधून सोबत हत्यारे घेऊन आले होते. त्यामुळे हल्ला पूर्वनियोजित असल्याची शक्यता व्यक्त करण्यात येत आहे. तसेच हल्ल्यामागच्या सूत्रधाराचा पोलिसांनी शोध घेऊन अटक करावी, अशी मागणी आरपीआय पक्षाने केली आहे.