टिटवाळ्यात इन्वर्टर शॉर्टसर्किटमुळे सदनिकेत आग;

टिटवाळ्यात सदनिकेत आग
टिटवाळा, ता. १६ (वार्ताहर) : टिटवाळा पश्चिमेतील वासुन्द्री रस्त्यावरील गणेश प्रतिमा या सोसायटीतील एका सदनिकेला मंगळवारी (ता. १६) अचानक आग लागल्याची घटना समोर आली. इन्व्हर्टर शॉर्टसर्किटमुळेही आग लागल्याची प्राथमिक माहिती समोर आली आहे. यामध्ये कोणतीही जीवितहानी झाली नाही. मात्र, मालमत्तेचे मोठ्या प्रमाणात नुकसान झाले आहे.
वासुन्द्री रस्त्यावरील गणेश प्रतिमा या सोसायटीच्या ए विंगमधील तिसऱ्या मजल्यावरील शालिक बागुल यांच्या घरात ही आग लागली होती. घरात कोणी नसल्याने मोठी दुर्घटना टळली. या घटनेची माहिती मिळताच अग्निशमन दल आणि पोलिस यंत्रणा तातडीने घटनास्थळी दाखल झाले. जवानांनी तातडीने बचावकार्य हाती घेत आगीवर नियंत्रण मिळवले. आगीच्या तीव्रतेमुळे सदनिकेतील फर्निचर, इलेक्ट्रॉनिक साहित्य व इतर घरगुती वस्तू मोठ्या प्रमाणावर जळून खाक झाल्या आहेत.
आग लागल्यानंतर सोसायटीतील रहिवाशांमध्ये भीतीचे वातावरण पसरले होते. संभाव्य धोका लक्षात घेता काही काळासाठी नागरिकांना सोसायटीबाहेर काढण्यात आले. वेळेवर मिळालेल्या मदतीमुळे मोठा अनर्थ टळला असल्याची भावना स्थानिक नागरिकांनी व्यक्त केली.
घरमालक बागुल यांनी दिलेल्या माहितीनुसार, या आगीत साधारण चार ते पाच लाखांच्या सामानाचे नुकसान झाले आहे. यावेळी पै पै जमवून आपले सजवलेले घर आगीत जळाल्याने महिलांचे अश्रू अनावर झाले.
दरम्यान, इन्वर्टर व विद्युत उपकरणांच्या सुरक्षिततेबाबत अधिक काळजी घेण्याची गरज असल्याचेही या घटनेनिमित्ताने पुन्हा एकदा अधोरेखित झाले आहे. घटनेचा पुढील तपास पोलीस यंत्रणेकडून सुरू आहे.