वेतनाअभावी उपासमारीची वेळ

वेतनाअभावी उपासमारीची वेळ
जिल्ह्यातील चतुर्थ श्रेणी कामगारांचे आंदोलन
पालघर, ता. १६ ः जिल्ह्यातील चारशेपेक्षा जास्त ग्रामपंचायतींमध्ये चतुर्थ श्रेणी कामगारांचे गेल्या तीन महिन्यांचे वेतन थकलेले आहे. त्यामुळे उपासमारीची वेळ आल्याने पालघर जिल्हा महाराष्ट्र राज्य ग्रामपंचायत कामगार सेनेने सोमवारी जिल्हा परिषद कार्यालयसमोर आंदोलन केले.
ग्रामपंचायतीमध्ये काम करणारे लिपिक, करवसुली कर्मचारी, वीजपुरवठा कामगार, सफाई कामगार, पाणीपुरवठा कामगार यांना कमी वेतन दिले जात आहे. बँक खात्यात कर्मचाऱ्यांचे वेतन वेळेवर होत नाही. अनेक मागण्या प्रलंबित असून त्याकडे प्रशासन दुर्लक्ष करीत आहे. त्यामुळे मागण्या पूर्ण होईपर्यंत बेमुदत कामबंद आंदोलन करण्याचा इशारा ग्रामपंचायत कामगार सेनेचे जिल्हाध्यक्ष विजय दुमाडा यांनी म्हटले आहे.
---------------------
आंदोलकांच्या मागण्या
ग्रामपंचायत कर्मचाऱ्यांच्या वेतन जमा होणाऱ्या बँक खात्यात वारंवार चुका होत असल्याने त्यांचे वेतन वेळेवर होत नाही, या चुका करणाऱ्या जिल्हा परिषद कर्मचाऱ्यांची चौकशी करावी, कोरोना काळात अन्य जिल्ह्याने प्रति महिना १,००० रुपयाप्रमाणे जमा केलेले मानधन पालघरमध्येही ग्रामपंचायत कर्मचाऱ्याच्या खात्यावर वर्ग करण्यात यावे, सफाई कामगार पाणीपुरवठा व कार्यालयीन कामासाठी रात्रंदिवस कार्यरत असणाऱ्या कर्मचाऱ्यांचा अपघात विमा व आरोग्य विमा काढण्यात यावा, सर्व कर्मचाऱ्यांना ओळखपत्र देण्यात यावे.