पूर्व उपनगरातील रुग्णांना दिलासा

पूर्व उपनगरातील रुग्णांना दिलासा
मुलुंडमधील एम. टी. अग्रवाल रुग्णालय सेवेत

सकाळ वृत्तसेवा
मुंबई, ता. १६ : पूर्व उपनगरातील रहिवाशांना अखेर सात वर्षांनी सुपरस्पेशालिटी रुग्णालयाची सुविधा मिळणार आहे. नवीन अत्याधुनिक एम. टी. अग्रवाल रुग्णालयाचे नुकतेच उद्‍घाटन करण्यात आले. त्यामुळे एकाच ठिकाणी व्यापक आणि दर्जेदार उपचार रुग्णांना मिळतील. परिणामी, महापालिकेच्या इतर प्रमुख रुग्णालयांवरील भार कमी होणार आहे.

२ ऑक्टोबर १९५८ रोजी २५ खाटांचे असलेले मुलुंडमधील महापालिकेचे एम. टी. अग्रवाल रुग्णालय वेळोवेळी विस्तारित केले जात आहे. दोन्ही इमारतींच्या जीर्ण स्थितीमुळे ते २०१७ मध्ये बंद करण्यात आले. या वेळी रुग्णालयाच्या सेवा तात्पुरत्या तीन ठिकाणी स्थलांतरित करण्यात आल्या. त्यानंतर, २०१८ मध्ये सुपरस्पेशालिटी रुग्णालयाचे बांधकाम सुरू झाले. या नवीन १० मजली इमारतीत ४७० खाटांची सुविधा असेल. यापैकी ३१० खाटा सामान्य आरोग्यसेवेसाठी आणि १६० खाटा सुपरस्पेशालिटी सेवांसाठी राखीव आहेत. हे सर्व सेवा टप्प्याटप्प्याने कार्यान्वित केल्या जातील. पहिल्या टप्प्यात ११० खाटा कार्यरत असतील. कोविड-१९ आणि इतर तांत्रिक कारणांमुळे या सुपरस्पेशालिटी रुग्णालयाची अंतिम मुदत तीन वेळा वाढविण्यात आली. सुरुवातीला हे रुग्णालय ऑक्टोबर २०२३ मध्ये पूर्ण होणार होते; परंतु कोविड-१९ मुळे त्याची अंतिम मुदत जून २०२४ आणि नंतर मार्च २०२५ पर्यंत वाढविण्यात आली.

अत्याधुनिक सुविधा
एम. टी. अग्रवाल रुग्णालयात न्यूरोसर्जरी, कार्डिऑलॉजी आणि कार्डिओव्हस्कुलर सर्जरी आणि हिप रिप्लेसमेंटसारख्या सुपरस्पेशालिटी सुविधा अद्ययावत करण्यात आल्या आहेत. यामध्ये गॅस्ट्रोसर्जरी, नेफ्रोलॉजी, यूरोलॉजी, ईएनटी, नेत्ररोग आणि सामान्य औषध यांसारखे विभागांचादेखील समावेश आहेत. ४७० बेडपैकी ६० बेड आयसीयू, एमआयसीयू आणि एनआयसीयूसाठी समर्पित असतील. या रुग्णालयात डायलिसिस, एमआरआय आणि सीटीस्कॅन सुविधादेखील उपलब्ध असतील.