दुबार नावांपुढे फक्त फुल्ल्या

दुबार नावांपुढे फक्त फुल्ल्या
अंतिम मतदार यादीतील बदलांवरून नाराजी
सकाळ वृत्तसेवा
नवी मुंबई, ता. १६ : महापालिकेची वादग्रस्त ठरलेली अंतिम मतदार यादी प्रसिद्ध झाली आहे, मात्र यादीतील चुकीच्या पत्त्यांवरील नावे जैसे थेच असून, दुबार नावांसमोर फक्त फुल्या मारलेल्या असल्याने बोगस मतदानाची भीती राजकीय पक्षांकडून व्यक्त केली जात आहे.
नवी मुंबई महापालिकेच्या १५ जानेवारीला होणाऱ्या निवडणुकीसाठी अंतिम मतदार यादी १५ डिसेंबरला प्रसिद्ध झाली. मतदार यादीमध्ये चार हजार ९०० आक्षेप नोंदवलेले होते. या आक्षेपांवर हरकती, सुनावणी घेऊन पालिकेच्या निवडणूक विभागाने अंतिम यादी संकेतस्थळावर प्रसिद्ध केली. या मतदार यादीत नागरिक आणि राजकीय पदाधिकाऱ्यांनी नोंदवलेल्या आक्षेपांनुसार १० हजार नावांची अदलाबदल केल्याचे निवडणूक विभागाने स्पष्ट केले आहे. तसेच तक्रारींनुसार प्रत्यक्ष स्थळ पाहणी, कागदपत्रांच्या पडताळणीनंतर १० हजार बदल केल्याची माहिती संजय शिंदे यांनी दिली.
----------------------------------
नावांचा घोळ कायम
आयुक्तांच्या निवासस्थानाच्या नावावर १२७ मतदार आहेत. स्वच्छतागृहात एक होता. बेलापूर विभाग कार्यालयाच्या नावावर ५७ मतदारांची नावे आहेत. कोकण भवनच्या पत्त्यावर काही जणांची नावे आहेत. तुर्भेत तृतीयपंथींची चाळ होती. ती चाळ पाडून त्या जागेवर शाळा तयार झाली आहे. तृतीयपंथी कोपरी गावात वास्तव्याला गेली आहेत. त्यांची नावे तुर्भेत आहेत. दिघा, कोपरखैरणे, नेरूळ, रबाळे येथील मतदारांची नावे तशीच आहेत.
---------------------------------
दिवाळे गावातून मयत झालेल्या नावांची यादी निवडणूक विभागाकडे दिली आहे, परंतु ती नावे रद्द झालेली नाहीत. असंख्य चुका, बोगस मतदार यादीचा समावेश असलेली यादी तयार केलेली आहे. त्यामुळे मतदान केंद्रांवर दोन चुकीच्या पत्त्यावर राहणारे मतदार आल्यास त्यांना चोप देऊ.
- गजानन काळे, प्रवक्ता, मनसे