खालापूरात टँकर दुचाकीच्या धडकेत तरुणाचा जागीच मृत्यू

खालापूरमध्ये टँकर-दुचाकीच्या धडकेत तरुणाचा मृत्यू

खालापूर, ता. १६ (बातमीदार) ः दुचाकीची टॅंकरला धडक बसून झालेल्या अपघातात संचित रामू बोरकर (वय २६, रा. अरिहंत कॉलनी, पाली फाटा) याचा जागीच मृत्यू झाला. सोमवारी (ता. १५) रात्री हा अपघात घडला. संचित सोमवारी रात्री दुचाकीवरून पाली फाटा येथील पूल उतरत असताना पुलावर जाण्यासाठी अचानक वळण घेतलेल्या टॅंकरला दुचाकीची जोरदार धडक बसली. यात संचितच्या डोक्याला गंभीर दुखापत झाल्याने मोठ्या प्रमाणात रक्तस्राव होऊन त्याचा जागीच मृत्यू झाला. अपघातानंतर तातडीने पोलिस घटनास्थळी पोहोचले. संचितचा मृतदेह शवविच्छेदनासाठी खालापूर प्राथमिक आरोग्य केंद्रात पाठवण्यात आला असून टँकरचालक अपघातानंतर फरार झाला आहे.
------
फोटो ः टँकरला धडकलेल्या संचितच्या दुचाकीचा चक्काचूर झाला.