कोपरखैरणे भुयारी मार्गात उघडी गटारे

कोपरखैरणे भुयारी मार्गात उघडी गटारे
लोखंडी जाळ्या चोरीमुळे वाहनचालक व पादचारी धोक्यात
वाशी, ता. १५ (बातमीदार): कोपरखैरणे येथील ठाणे-बेलापूर मार्ग आणि अंतर्गत रस्त्यांना जोडणाऱ्या भुयारी मार्गात गटारांवरील लोखंडी जाळ्या चोरीला गेल्याने गंभीर धोका निर्माण झाला आहे. भुयारी मार्गात पावसाळ्यात पाणी साचू नये यासाठी गटारे बांधण्यात आली असून, वाहनांचे अपघात टाळण्यासाठी नवी मुंबई महानगरपालिकेकडून त्यावर लोखंडी जाळ्या बसवण्यात आल्या होत्या, मात्र काही समाजकंटकांनी या जाळ्या चोरून नेल्याने सध्या गटारे उघडी पडली आहेत.
या भुयारी मार्गातून एकावेळी मर्यादित चारचाकी वाहनेच जाऊ शकतात, तर दुचाकींना बाजूने मार्ग काढावा लागतो, मात्र गटारांवर जाळी नसल्याने दुचाकी वाहनांना मोठा धोका निर्माण झाला आहे. अनेक वेळा वाहने गटारात अडकून अपघात झाल्याच्या घटनाही घडत असल्याचे वाहनचालकांचे म्हणणे आहे. भुयारी मार्गाच्या कडेला चालणाऱ्या पादचाऱ्यांनाही उघड्या गटारांमुळे जीव मुठीत धरून चालावे लागत आहे.
नागरिकांच्या मते, हा मार्ग वर्दळीचा असून, लहान मुले, ज्येष्ठ नागरिक व कामगार मोठ्या प्रमाणावर ये-जा करतात. त्यामुळे तातडीने गटारांवर नवीन व मजबूत लोखंडी जाळ्या बसवाव्यात, तसेच चोरी रोखण्यासाठी कडक उपाययोजना कराव्यात, अशी जोरदार मागणी वाहनचालक सचिन पाटील यांच्यासह स्थानिक नागरिकांकडून करण्यात येत आहे.