नवापूर ग्रामपंचायत अधिकारी राजेश संखे लाच घेताना अटकेत

लाच घेताना ग्रामपंचायत अधिकारी अटकेत
पालघर, ता. १६ ः तालुक्यातील नवापूर ग्रामपंचायत अधिकारी राजेश पंढरीनाथ संखे याला २० हजारांची लाच घेताना मंगळवारी (ता. १६) रंगेहाथ पकडले. ग्रामपंचायतीमधील एका कृषी पर्यटन केंद्राला ना हरकत दाखला देण्यासाठी संखे याने पैशांची मागणी केली होती. ती लाच स्वीकारताना पालघरच्या लाचलुचपत विभागाने संखे याला ताब्यात घेऊन त्याच्याविरुद्ध सातपाटी पोलिस ठाण्यात गुन्हा दाखल केला आहे.
नवापूर गावामध्ये एक कृषी पर्यटन केंद्र आहे. कृषी पर्यटन केंद्राच्या मालकाने तरंग तलाव, कृषी पर्यटन त्यामध्ये पर्यटकांसाठी तीन खोल्या, उपहारगृह व न्याहरीगृह सुरू करण्यासाठी नवापूर ग्रामपंचायतीकडे ना हरकत दाखला मिळण्याकरता विनंती अर्ज केला होता, मात्र ग्रामपंचायत अधिकारी तथा ग्रामसेवक राजेश संखे यांनी ना हरकत न देता तक्रारदार यांच्याकडे २० हजार रुपयांच्या लाचेची मागणी केली. त्यानुसार तक्रारदार यांनी पालघरच्या लाचलुचपत प्रतिबंधक विभागाकडे तक्रार दाखल केली. लाचलुचपत विभागाने मंगळवारी या प्रकरणाची पडताळणी केली असता त्यात तथ्य आढळले.
लाचलुचपत विभागाचे पोलिस उपअधीक्षक दादाराम करांडे, पोलिस निरीक्षक राकेश डांगे, पोलिस कर्मचारी विलास भोये, आकाश लोहारे व जितेंद्र गवळे या पथकाने सापळा रचला. त्या वेळी संखे याने तक्रारदाराकडून पंचासमक्ष २० हजार रुपये रोख रक्कम स्वीकारली. ही लाच स्वीकारताना सापळा लावलेल्या पथकाने संखे याला रंगेहाथ पकडले व ताब्यात घेतले.