म्हात्रे-नाईक पालिकेत एकत्र

म्हात्रे-नाईक पालिकेत एकत्र
प्रचारात सहभागी होण्याची शक्यता
सकाळ वृत्तसेवा
नवी मुंबई, ता. १६ : नवी मुंबईच्या राजकारणात म्हात्रे आणि नाईक यांच्यातील शत्रुत्व सर्वज्ञृत आहे. पण महापालिका निवडणुकीत मात्र दोन्ही नेते एकत्र प्रचारात सहभागी होण्याची शक्यता असून आमदार मंदा म्हात्रे यांनी तसे संकेतही दिले आहेत.
महापालिका निवडणुकीकरीता नुकताच वाशी येथे इच्छूकांच्या मुलाखती पार पडल्या. या मुलाखतीसाठी भाजपतर्फे आमदार मंदा म्हात्रे, प्रभारी म्हणून नियुक्त केलेले माजी खासदार डॉ. संजीव नाईक, जिल्हाध्यक्ष डॉ. राजेश पाटील उपस्थित होते. ८०० पेक्षा जास्त इच्छुकांनी उमेदवारीसाठी मुलाखत दिली. यावेली कोविडकाळापासून ते आजपर्यंत विविध पातळीवर सर्व सुविधा देण्यासाठी कटीबद्ध असल्याचे म्हात्रे यांनी सांगितले. विकास कामांच्या जोरावर पालिकेत मते मागणार आहे. भाजपच्या माध्यमातूनच शहराचा विकास होणार आहे. त्यासाठी ताकदीने प्रचारात उतरणार असल्याचे सांगितले.
----------------------
नव्या चेहऱ्यांना संधी
वनमंत्री गणेश नाईक यांचे पुत्र माजी आमदार संदीप नाईक यांनी बंडखोरी करीत मंदा म्हात्रेंविरोधात राष्ट्रवादी काँग्रेस शरद पवार पक्षातून उमेदवारी अर्ज भरला होता. त्यावेळी बेलापूर मतदार संघातील माजी नगरसेवकांनी संदीप नाईक यांच्या प्रचाराचे काम केले होते. आता तेच नगरसेवक पुन्हा निवडणुकीच्या रिंगणात उतरणार आहेत. त्यामुळे या नगरसेवकांना पुन्हा संधी मिळणार की नवे चेहरे मैदानात उतरणार याबाबत उत्सुकता आहे.
---------------------------
वाशी येथे भाजपतर्फे मुलाखतीवेळी ८५० लोकांनी इच्छा व्यक्त केली आहे. प्रस्थापित चेहऱ्यांसोबतच काही प्रभागात नवीन चेहरे देण्याचा प्रयत्न असणार आहेत. विधानसभेच्या वेळेस धावपळ करणाऱ्या कार्यकर्त्यांना न्याय देण्याचा प्रयत्न केला जाणार आहे.
- मंदा म्हात्रे, आमदार, भाजप