उल्हासनगरात विकासकामांचे भूमिपूजन

उल्हासनगर, ता. १६ (बातमीदार) : उल्हासनगर महापालिकेच्या प्रभाग क्रमांक १८ मध्ये आचारसंहिता लागू होण्यापूर्वीच तब्बल नऊ ठिकाणी विकासकामांच्या भूमिपूजनाचा मुहूर्त साधण्यात आला आहे. लाँग मार्चचे प्रणेते प्रा. जोगेंद्र कवाडे यांच्या पिपल्स रिपब्लिकन पार्टीचे माजी नगरसेवक प्रमोद टाले यांच्या अथक प्रयत्नातून ही विकासकामे मार्गी लागली आहेत.
विकासकामांचे भूमिपूजन आमदार डॉ. बालाजी किणीकर यांच्या हस्ते; तसेच स्थानिक नागरिकांच्या उपस्थितीत पार पडले. कार्यक्रमावेळी जानेवारीमध्ये होणाऱ्या महापालिका निवडणुकीत प्रभाग १८ मधून ओबीसी महिला राखीव उमेदवार म्हणून निवडणूक लढविण्यास सज्ज असलेल्या नाट्य अभिनेत्री अक्षता टाले यांची उपस्थिती विशेष आकर्षण ठरली. यापूर्वी या प्रभागातून प्रमोद टाले हे ओबीसी पुरुष राखीव जागेतून नगरसेवक म्हणून निवडून आले होते. मात्र, यावेळी प्रभागातील ओबीसी जागा महिला राखीव झाल्याने, त्यांनी आपली कन्या अक्षता टाले यांना निवडणुकीच्या रिंगणात उतरवण्याचा निर्णय घेतला आहे. त्याच पार्श्वभूमीवर त्यांच्या उपस्थितीने या कार्यक्रमाला राजकीय महत्त्व प्राप्त झाले आहे.
प्रभागातील अचानक नगर, बुद्ध कॉलनी, भरत नगर, दहाचाळ, महात्मा फुले कॉलनी, अशोक वन कॉलनी, हनुमान नगर, पितामह सुभेदार रामजी आंबेडकर नगर, समता नगर-२ आणि सिद्धार्थ नगर या भागांमध्ये विविध विकासकामांचे भूमिपूजन करण्यात आले. विकासकामांमुळे प्रभागातील मूलभूत सुविधा अधिक सक्षम होणार असून, नागरिकांच्या दैनंदिन समस्यांना दिलासा मिळणार असल्याची अपेक्षा व्यक्त करण्यात येत आहे.