दिव्यांग विद्यार्थ्यांच्या कलागुणांना वाव

दिव्यांग विद्यार्थ्यांच्या कलागुणांना वाव
‘गगनाला पंख नवे’ उपक्रम उत्साहात

घाटकोपर, ता. १६ (बातमीदार) : दिव्यांग व विशेष गरजा असलेल्या विद्यार्थ्यांच्या कलागुणांना व्यासपीठ देणारा ‘गगनाला पंख नवे’ हा उपक्रम प्रभादेवीतील रवींद्र नाट्य मंदिर येथील पूल अकादमीच्या प्रांगणात रविवारी (ता. १४) अत्यंत उत्साहात पार पडला. या प्रेरणादायी सोहळ्यासाठी उत्तरा सोमैया व डॉ. मेधा सोमैया यांच्या मार्गदर्शनामुळे स्टॉलची विशेष सुविधा उपलब्ध करून देण्यात आली होती.
उपक्रमात शुभ्रा प्रकल्प या संस्थेच्या अध्यक्षा भाग्यश्री वर्तक यांनी सक्रिय सहभाग नोंदवला. तसेच जनशिक्षण संस्था रायगड, गुरुकुल सेंटर फॉर स्पेशल चिल्ड्रन यांचा सहभाग होता. विद्यार्थ्यांनी स्वतः तयार केलेल्या विविध हस्तकला वस्तू, सजावटीच्या वस्तू, पेंटिंग्ज व कलाकृतींचे प्रदर्शन या स्टॉलमध्ये मांडण्यात आले होते.