वाहतूकदार व बाजार समिती कर्मचाऱ्यांत वाद

वाहतूकदार व बाजार समिती कर्मचाऱ्यांत वाद
शुल्क वसुलीवरून जावक गेटवर गोंधळ; पोलिस ठाण्यात धाव
जुईनगर, ता. १५ (बातमीदार) : मुंबई कृषी उत्पन्न बाजार समितीच्या फळ मार्केटमधील जावक गेटवर बाजार प्रवेश शुल्क व सेस वसुलीवरून आज तीव्र वाद झाला. योग्य शुल्क न भरता दररोज मोठ्या संख्येने वाहने बाहेर काढणाऱ्या एका वाहतूकदाराने बाजार समितीच्या अधिकारी व कर्मचाऱ्यांशी वाद घालत शिवीगाळ व दमदाटी केल्याने परिसरात तणावाचे वातावरण निर्माण झाले. परिस्थिती नियंत्रणाबाहेर जाण्याची चिन्हे दिसताच उपसचिव, सुरक्षा अधिकारी व कर्मचाऱ्यांनी जावक गेट बंद करून पोलिस ठाण्यात धाव घेत तक्रार दाखल केली.
जावक गेटवर प्रायोगिक तत्त्वावर थेट बाजार फी वसुली सुरू आहे. या व्यवस्थेमुळे पारदर्शकता वाढावी, महसूल गळती थांबावी, हा उद्देश असला तरी काही वाहतूकदारांकडून त्याला विरोध होत असल्याचे प्रशासन सांगते. आज सुरक्षा कर्मचाऱ्यांनी संबंधित वाहतूकदाराकडे गेट पास व योग्य सेस पावतीची मागणी केली असता, त्याने कर्मचाऱ्यांवर दादागिरी करत शिवीगाळ केल्याचा आरोप आहे. परिणामी वाद चिघळला.
या घटनेचे सीसीटीव्ही फुटेज उपलब्ध असून, त्यात वाहतूकदार कर्मचाऱ्यांच्या अंगावर धावून जात असल्याचे दिसते. संभाव्य अनुचित प्रकार टाळण्यासाठी जावक गेट काही काळ बंद ठेवण्यात आले. त्यामुळे शेतमाल घेऊन बाहेर पडणाऱ्या वाहनांच्या बाजार आवारात लांबच लांब रांगा लागल्या आणि वाहतुकीवर परिणाम झाला.
कर्मचाऱ्यांच्या माहितीनुसार संबंधित वाहतूकदार दररोज १० ते १५ वाहनांद्वारे शेतमाल बाहेर नेत असून, प्रतिवाहन किमान १,५०० रुपयांहून अधिक सेस अपेक्षित असताना केवळ ४० ते ५० रुपये भरून वाहने सोडली जात असल्याचा आरोप आहे. यामुळे बाजार समितीला मोठ्या आर्थिक नुकसानीचा फटका बसत असल्याचे प्रशासनाचे म्हणणे आहे.
भविष्यात असे वाद टाळण्यासाठी भाजीपाला तसेच कांदा-बटाटा मार्केटप्रमाणे निश्चित व पारदर्शक सेस आकारणी पद्धत राबवावी, तसेच नियमांचे काटेकोर पालन व्हावे, अशी मागणी बाजार घटक व व्यापाऱ्यांकडून होत आहे.
चौकट : वादाचे मुद्दे
- दररोज १० ते २५ वाहने शुल्क न भरता बाहेर काढल्याचा आरोप
- प्रतिवाहन किमान १,५०० रुपयांहून अधिक सेस अपेक्षित
- केवळ ४०-५० रुपये भरून वाहने सोडल्याचे कर्मचारी सांगतात