मुल चोरणाऱ्या त्रिकुटाला कारावास

मूल चोरणाऱ्या त्रिकुटाला सश्रम कारावास
ठाणे शहर, ता. १६ (बातमीदार) ः पाच महिन्यांचे मूल चोरी करणाऱ्या त्रिकुटाला ठाणे सत्र न्यायालयाने तीन वर्षे सश्रम कारावासाची शिक्षा सुनावली आहे. दोषारोपपत्र दाखल होताच न्यायाधीशांनी वर्षभरात हा निकाल दिला. गेल्या वर्षी ठाणेनगर पोलिस ठाण्याच्या हद्दीत ही घटना घडली होती. एका बेघर महिलेचे मूल त्रिकुटाने पळवले होते. पोलिसांनी सिसिटीव्हीच्या आधारे चोरट्यांचा माग काढून त्यांना गजाआड केले होते.
भंगार वेचण्याचे काम करणाऱ्या वनिता पवार आणि त्यांचे पती अशोक यांना राहण्यासाठी घर नाही. त्यामुळे दिवसभर भंगार वेचण्याचे काम झाल्यावर हे फिरस्ता दाम्पत्य मिळेल त्या जागेचा रात्री आश्रय घेतात. १० ऑक्टोबर २०२४ला ते दिवसभराचे काम करून रात्री चार मुलांसह पोलिस लाइन, सिद्धी हॉलच्या समोरील पुलाखाली झोपले होते. सकाळी ६ वाजता त्यांना जाग आली असता त्यांना त्यांचा पाच महिन्यांचा मुलगा दिसला नाही. त्यांनी आजूबाजूला शोध घेऊनही तो सापडला नाही. त्यांनी ठाणेनगर पोलिस ठाण्यात गुन्हा दाखल केला. पोलिस उपनिरीक्षक भारत मारकड यांनी गुन्ह्याचा तपास केला. तांत्रिक माहिती आणि सीसीटीव्ही फुटेजच्या आधारे घटनेचा शोध घेतला असता अमजल अली न्हावी, जयश्री नाईक, सुरेखा खंडागळे हे तीन आरोपी निष्पन्न झाले. त्यांना अटक करून दोषारोपपत्र न्यायालयात पाठवले असता ठाणे जिल्हा व सत्र न्यायालयाचे सत्र न्यायाधीश एस. एस. शिंदे यांनी सरकारी वकील संजय मोरे यांनी केलेला जोरदार युक्तिवाद आणि साक्षी पुराव्याच्या आधारे तिघांनाही मूल चोरण्याच्या गुन्ह्यात दोषी ठरवले. प्रत्येकाला तीन वर्षांचा सश्रम करावास आणि ५०० रुपये दंडाची शिक्षा सुनावली. दंड न भरल्यास शिक्षेत एका महिन्याची साधी कैद वाढेल, असाही निर्णय दिला.