नवी मुंबईत उबाठा–काँग्रेसला धक्का

नवी मुंबईत उबाठा-काँग्रेसला धक्का
मढवी कुटुंबीय व पूनम पाटील यांचा शिवसेना शिंदे गटात प्रवेश
वाशी, ता. १६ (बातमीदार) ः नवी मुंबईत राजकीय वर्तुळात मोठी उलथापालथ घडली आहे. शिवसेना (उबाठा) गटाचे माजी नगरसेवक एम. के. मढवी, करण मढवी, माजी नगरसेविका विनया मढवी, तसेच नवी मुंबई जिल्हा काँग्रेसच्या जिल्हाध्यक्ष पूनम पाटील यांनी शिवसेना शिंदे गटात जाहीर प्रवेश केला. ठाणे येथे आयोजित कार्यक्रमात उपमुख्यमंत्री एकनाथ शिंदे यांच्या उपस्थितीत हा पक्षप्रवेश झाला.
या पक्षप्रवेशामुळे नवी मुंबईतील शिवसेना (उबाठा) गट आणि काँग्रेसला मोठा धक्का बसला आहे. दोन्ही पक्षांच्या स्थानिक संघटनांमध्ये खळबळ उडाली आहे. मढवी कुटुंबीयांचे ऐरोलीतील राजकारणात प्रभावी स्थान असून, विविध प्रभागांमध्ये त्यांचा जनसंपर्क आहे. तसेच काँग्रेसच्या जिल्हाध्यक्षपदावर कार्यरत असलेल्या पूनम पाटील यांच्या प्रवेशामुळे काँग्रेसच्या संघटनात्मक ताकदीला खिंडार पडल्याचे चित्र आहे. या वेळी उपमुख्यमंत्री एकनाथ शिंदे यांनी नव्याने प्रवेश केलेल्या सर्व नेत्यांचे स्वागत करत, विकासाभिमुख विचारधारेसोबत काम करण्यासाठी अनेक अनुभवी नेते शिवसेना शिंदे गटात येत आहेत. नवी मुंबईच्या सर्वांगीण विकासासाठी हे सर्वजण महत्त्वाची भूमिका बजावतील, असा विश्वास व्यक्त केला. दरम्यान, आगामी महापालिका निवडणुकांच्या पार्श्वभूमीवर झालेला हा पक्षप्रवेश महत्त्वाचा मानला जात असून, नवी मुंबईतील राजकीय समीकरणे बदलण्याची शक्यता वर्तवली जात आहे. उबाठा गट आणि काँग्रेससाठी हा मोठा धक्का मानला जात असताना, शिंदे गटाची ताकद मात्र या प्रवेशामुळे अधिक भक्कम झाल्याचे चित्र आहे.