चिकू उत्तम कृषी पद्धतीचे कार्यशाळेत मिळाले धडे

बोर्डीत ''मॅग्नेट'' प्रकल्पांतर्गत चिकू उत्पादकांसाठी कार्यशाळा उत्साहात
बोर्डी, ता. १७ (बातमीदार) : महाराष्ट्र ॲग्री बिझनेस प्रकल्प (मॅग्नेट), राष्ट्रीय सुगी पश्चात तंत्रज्ञान संस्था आणि घोलवड बोर्डी शेतकरी उत्पादक कंपनी यांच्या संयुक्त विद्यमाने चिकूच्या उत्तम कृषी पद्धतींवर नुकतीच एक दिवसीय कार्यशाळा पार पडली. या प्रशिक्षणात परिसरातील १०५ शेतकऱ्यांनी सहभाग घेतला.
कार्यशाळेचे उद्घाटन ''आत्मा''चे प्रकल्प संचालक अविनाश पवार, तालुका कृषी अधिकारी, डहाणू, शेतकरी उत्पादक कंपनीचे अध्यक्ष, प्रणिल सावे व संचालक मंडळ यांच्या हस्ते झाले. यावेळी अविनाश पवार यांनी चिकू लागवडीत आधुनिक बदल करण्याचे व आंतरपिके घेण्याचे आवाहन केले. नवसारी कृषी संशोधन केंद्राच्या शास्त्रज्ञांनी खत व सिंचन व्यवस्थापन, कीड नियंत्रण आणि काढणीपश्चात तंत्रज्ञान यावर सखोल मार्गदर्शन केले. कार्यक्रमात मॅग्नेट प्रकल्पाच्या योजना, अनुदान आणि शेतीतील महिलांचा सहभाग यावरही चर्चा झाली. यावेळी पॅकिंगसाठी कोरुगेटेड बॉक्स, कीड नियंत्रणाचे ट्रॅप्स आणि सोलर ड्रायरचे प्रदर्शन करण्यात आले. ही कार्यशाळा यशस्वी करण्यासाठी स्थानिक शेतकरी उत्पादक कंपनीच्या पदाधिकाऱ्यांनी विशेष परिश्रम घेतले.