दहावीच्या परीक्षेत उत्कृष्ट कामगिरी करा

दहावीच्या परीक्षेत उत्कृष्ट कामगिरी करा : संदीप नाईक
एसएससी सराव परीक्षेचा शुभारंभ; प्रश्नपत्रिका संचांचे मोफत वितरण
वाशी, ता. १८ (बातमीदार) : सामाजिक संस्था संदीप नाईक प्रतिष्ठान यांच्या वतीने एसएससी बोर्डाच्या धर्तीवरील सराव परीक्षा नेरूळ येथील विद्या भवन स्कूलमध्ये सुरू झाली आहे. या वेळी प्रतिष्ठानचे अध्यक्ष संदीप नाईक व मान्यवरांच्या हस्ते दहावीच्या परीक्षेसाठी उपयुक्त सराव प्रश्नपत्रिका संचांचे प्रकाशन करण्यात आले. प्राथमिक टप्प्यात हे प्रश्नपत्रिका संच विद्यार्थ्यांना विनामूल्य वितरित करण्यात आले.
याप्रसंगी विद्यार्थ्यांना मार्गदर्शन करताना संदीप नाईक यांनी दहावीच्या परीक्षेसाठी नियोजनपूर्वक अभ्यास करण्याचा सल्ला देत, सराव परीक्षांचा योग्य वापर केल्यास मुख्य परीक्षेत उत्कृष्ट कामगिरी करता येईल, असा विश्वास व्यक्त केला. यावर्षी एसएससी सराव परीक्षा उपक्रमाने २७ व्या वर्षात पदार्पण केले असून, ५४ परीक्षा केंद्रांवर सुमारे नऊ हजार विद्यार्थी सहभागी झाले आहेत.
या कार्यक्रमात गुणवंत शिक्षकांचाही सन्मान करण्यात आला. उपक्रमशीलतेसाठी मनोज महाजन यांना आयडॉल शिक्षक पुरस्कार प्राप्त झाला आहे. तसेच महाराष्ट्र शासन शालेय शिक्षण विभागाच्या ‘मुख्यमंत्री माझी शाळा, सुंदर शाळा - टप्पा २’ अभियानांतर्गत ठाणे जिल्ह्यातून विद्या भवन प्राथमिक मराठी शाळा, नेरूळ हिला प्रथम क्रमांक मिळाला आहे. याचबरोबर महाराष्ट्र शासन शालेय शिक्षण विभागाचा ‘क्रांतिज्योती सावित्रीमाई आदर्श शिक्षक राज्य पुरस्कार २०२३’ अविनाश मुरलीधर कुलकर्णी (सहाय्यक शिक्षक, विद्या भवन हायस्कूल व ज्युनियर कॉलेज, नेरूळ) यांना बहाल करण्यात आला.