वीर वाजेकर महाविद्यालयात कौशल विकास मार्गदर्शन कार्यशाळा संपन्न

कौशलविकास मार्गदर्शन कार्यशाळा
उरण, ता. १८ (वार्ताहर) : रयत शिक्षण संस्था संचलित वीर वाजेकर कला, विज्ञान व वाणिज्य महाविद्यालय, फुंडे येथे कौशलविकास मार्गदर्शन कार्यशाळेचे आयोजन करण्यात आले.
बारावी उत्तीर्ण विद्यार्थी तसेच १८ ते ३० वयोगटातील तरुणांना रोजगारासाठी आवश्यक विविध कौशल्य प्रशिक्षण मोफत उपलब्ध करून देण्याच्या उद्देशाने ही कार्यशाळा घेण्यात आली. महाविद्यालयाच्या प्रांगणात प्रथम एज्युकेशन फाउंडेशनमार्फत हे प्रशिक्षण दिले जाणार असून, त्याबाबत सविस्तर माहिती विद्यार्थ्यांना देण्यात आली.
कार्यशाळेच्या उद्घाटनप्रसंगी महाविद्यालयाचे प्र. प्राचार्य डॉ. आमोद ठक्कर यांनी आजच्या स्पर्धात्मक युगात व्यावसायिक शिक्षणाचे महत्त्व अधोरेखित केले. प्रथम एज्युकेशन फाउंडेशनचे सिनियर प्रोग्राम असोसिएट नितीन अंब्रूले यांनी त्यांच्या संस्थेमार्फत राबविण्यात येणाऱ्या विविध कोर्सची माहिती देत, हे सर्व कोर्स महाविद्यालयातच मोफत सुरू करण्यात येणार असल्याचे स्पष्ट केले.
या कार्यशाळेस सुमारे १५० विद्यार्थी, माजी विद्यार्थी व गरजू युवक उपस्थित होते. कार्यक्रमाचे प्रास्ताविक डॉ. झेलम झेंडे यांनी केले. सूत्रसंचालन प्रा. प्रांजल भोईर यांनी तर आभार प्रा. भूषण ठाकूर यांनी मानले.