एकाच छताखाली निदान, वैद्यकिय सल्ला आणि आधुनिक उपचार सुविधांचा घेता येणार लाभ

मुंबईतील कर्करोगग्रस्त रुग्णांना मिळणार दिलासा

एकाच छताखाली निदान, वैद्यकीय सल्ला अन्‌ उपचार

सकाळ वृत्तसेवा
मुंबई, ता. १७ : देशात कर्करोगग्रस्त रुग्णांमध्ये चिंताजनक वाढ होत असून मुंबईतील परळच्या ग्लेनईगल्स रुग्णालयात ‘इन्स्टिट्यूट ऑफ ऑन्को-सायन्स’ या अत्याधुनिक कर्करोग केंद्राची सुरुवात करण्यात आली आहे. या सुविधेमुळे रुग्णांना एकाच छताखाली वेळीच निदान आणि प्रगत उपचार घेता येणार आहे. या ठिकाणी देशातील चार सर्वात प्रतिष्ठित कर्करोगतज्ञ्ज्ञांच्या मार्गदर्शनाखाली उपचार केले जाणार आहेत. यामध्ये प्रो. डॉ. शैलेश व्ही. श्रीखंडे (जीआय आणि एचपीबी कॅन्सर), डॉ. प्रथमेश पाई (डोके आणि मानेचा कर्करोग), डॉ. प्रदीप राव (युरो कॅन्सर), डॉ. तुषार जाधव (स्तन कर्करोग) या कर्करोगतज्ज्ञांचा समावेश आहे.

इन्स्टिट्यूट ऑफ ऑन्को-सायन्स येथे रुग्णांना एकाच छताखाली कर्करोगाशी संबंधित तपासणी व निदानाची सुविधा उपलब्ध करून देण्यात आली आहे. याठिकाणी अत्याधुनिक उपचार पद्धती, रुग्णांचे समुपदेशन, पोषण आणि पुनर्प्राप्तीसह सर्वच सुविधा उपलब्ध करून देण्यात आल्या आहेत. ग्लेनईगल्स रुग्णालयाचे सीईओ डॉ. बिपीन चेवले यांनी सांगितले, की कर्करोग ही केवळ एक वैद्यकीय स्थिती नसून ते रुग्णाच्या संपूर्ण कुटुंबाला बदलून टाकते. वेळीच निदान व प्रत्येक रुग्णाला जगण्याची एक नवी संधी मिळवून देणे गरजेचे आहे.