सरावलीतील केमिकलयुक्त सांडपाण्याबाबत प्रशासनाकडून आश्वासन

सरावलीतील केमिकल सांडपाण्याचा प्रश्न सुटणार!
तारापुर, ता. १७ (बातमीदार) : सरावली ग्रामपंचायत हद्दीतील नैसर्गिक नाल्यांमध्ये कारखान्यांकडून सोडल्या जाणाऱ्या बेकायदेशीर रासायनिक सांडपाण्याबाबत प्रशासनाने अखेर नमती भूमिका घेतली आहे. महाराष्ट्र औद्योगिक विकास महामंडळ (एमआयडीसी) आणि प्रदूषण नियंत्रण मंडळाच्या अधिकाऱ्यांनी औद्योगिक क्षेत्रातून गावात येणारे नाले पावसाळ्यापूर्वी कायमस्वरूपी बंद करण्याचे आश्वासन दिल्याने, महाराष्ट्र नवनिर्माण सेनेचे (मनसे) आंदोलन तूर्तास स्थगित करण्यात आले आहे.
या गंभीर प्रश्नावर महाराष्ट्र नवनिर्माण विद्यार्थी सेनेचे उपाध्यक्ष विजय गांगुर्डे यांनी आंदोलनाचा इशारा दिला होता. त्या पार्श्वभूमीवर एमआयडीसीचे उपअभियंता अविनाश संखे आणि प्रदूषण मंडळाचे अधिकारी विश्वजीत सोरगे यांच्या उपस्थितीत संयुक्त बैठक पार पडली. बैठकीत प्रशासनाने ठोस उपाययोजना करण्याचे मान्य केले आहे. दरम्‍यान, मनसे जिल्हाध्यक्ष समीर मोरे, धीरज गावड आणि विजय गांगुर्डे यांनी स्पष्ट केले की, जर पावसाळ्यापर्यंत हे नाले बंद झाले नाहीत आणि रासायनिक पाणी पुन्हा गावात शिरले, तर अधिक तीव्र स्वरूपाचे आंदोलन छेडले जाईल. या यशस्वी पाठपुराव्यामुळे सरावली ग्रामस्थांना दिलासा मिळण्याची शक्यता निर्माण झाली आहे.