सराईत गुन्हेगाऱ्यांच्या आवळल्या मुसक्या

सराईत गुन्हेगारांच्या आवळल्या मुसक्या
२० गुन्ह्यांची कबुली; भिवंडी गुन्हे शाखेची कर्नाटकात कामगिरी

सकाळ वृत्तसेवा
ठाणे, ता. १७ ः मोक्का गुन्ह्यातील सराईत गुन्हेगार अब्बास ऊर्फ बड्डा युनूस सय्यद (वय २१) याच्या ठाणे शहर पोलिस दलातील भिवंडी गुन्हे शाखेच्या पथकाला कर्नाटकात मुसक्या आवळण्यात यश आले आहे. त्याने ठाणे, मुंब्रा, भिवंडी, उल्हासनगर व अंबरनाथ या शहरात २० सोनसाखळी चोरीच्या गुन्ह्यांची कबुली दिली. या गुन्ह्यातील तब्बल ३० लाख २२ हजार ५०० रुपयांचे एकूण २३२.५ ग्रॅम वजनाचे सोन्याचे दागिने हस्तगत करण्यात आल्याची माहिती ठाणे गुन्हे शाखेचे पोलिस उपायुक्त अमरसिंह जाधव यांनी बुधवारी (ता. १७) पत्रकार परिषदेत दिली.
ठाणे शहर पोलिस आयुक्तालयात जबरी सोनसाखळीच्या होणाऱ्या घटनांना आळा घालण्यासाठी वरिष्ठांनी सूचना दिलेल्या होत्या, त्याप्रमाणे भिवंडी गुन्हे शाखा, घटक २चे वरिष्ठ पोलिस निरीक्षक जनार्दन सोनवणे यांच्या मार्गदर्शनाखालील पोलिस उपनिरीक्षक रवींद्र पाटील व पथक हे नारपोली पोलिस ठाण्यातील गुन्ह्याचा समांतर तपास करीत असताना कल्याण, आंबिवली येथील अब्बास ऊर्फ बड्डा युनूस सय्यद याचे नाव निष्पन्न करून त्याला कर्नाटक बिदर येथून ताब्यात घेतले. चौकशीत त्याने त्याच्या साथीदारासह भिवंडी, मुंब्रा, ठाणे, उल्हासनगर व अंबरनाथ शहरात २० सोनसाखळी चोरी केल्याची कबुली दिली. अब्बास हा सराईत गुन्हेगार असून त्याच्याविरुद्ध यापूर्वी खडकपाडा पोलिस ठाण्यात सोनसाखळी चोरीचे गुन्हे दाखल आहेत, असेही पोलिसांनी सांगितले.