दहिसर ते मीरा-भाईंदरच्या मेट्रो ९ची चाचणी पूर्ण

दहिसर ते मिरा-भाईंदरच्या
मेट्रो ९ची चाचणी पूर्ण
अंतिम प्रमाणपत्र मिळताच सुरू होणार

सकाळ वृत्तसेवा
मुंबई, ता. १७ : गुंदवली-दहिसर या मेट्रो ७चा विस्तार असलेल्या दहिसर ते मिरा-भाईंदर मेट्रो-९ मार्गिकेची उभारणी करण्यात येत आहे. त्याचा दहिसर ते काशिगाव हा पहिला टप्पा पूर्ण झाला असून, त्याची चाचणी नुकतीच मेट्रो रेल्वे सुरक्षा आयुक्तांच्या (सीएमआरएस) उपस्थितीत पूर्ण झाली आहे. त्यामुळे सीआरएमएसकडून अंतिम सुरक्षा प्रमाणपत्र मिळताच ही मेट्राे सेवेत दाखल होणार आहे. सध्या महापालिका निवडणुकांसाठीची आचारसंहिता लागू असल्याने निवडणुकीनंतरच प्रवासी सेवेत येऊ शकणार आहे.

मेट्रो-९ ही दहिसर ते मिरा-भाईंदरदरम्यान उभारली जात आहे. पहिल्या टप्प्यात दहिसर पूर्व, पांडुरंगवाडी, मिरा गाव, काशिगाव या स्थानकांदरम्यान मेट्रो सुरू करण्याचे नियोजन आहे. त्या पार्श्वभूमीवर नुकतेच मेट्रो सुरक्षा आयुक्तांच्या उपस्थितीत चाचण्या पार पडल्या आहेत. त्यामुळे त्यांचे सुरक्षा प्रमाणपत्र कधी मिळणार याकडे एमएमआरडीएचे लक्ष लागले आहे.