कोयता घेऊन फिरणाऱ्यास अटक

कोयता घेऊन फिरणाऱ्यास अटक

ठाणे : सार्वजनिक ठिकाणी हातामध्ये धारदार लोखंडी कोयता घेऊन फिरणाऱ्या जीवन गणेश तिवारी (वय २५) या तरुणाला कासारवडवली पोलिसांनी ताब्यात घेतले. तो १४ डिसेंबर रोजी रात्री पावणेअकरा वाजण्याच्या सुमारास बोरिवलीहून पालिका गार्डनच्या बाजूला असलेल्या मार्गावर हातामध्ये धारदार लोखंडी कोयता घेऊन फिरताना आढळून आला. त्याच्या विरोधात गुन्हा दाखल करण्यात आल्याची माहिती कासारवडवली पोलिसांनी दिली.
......

रेल्वे स्थानकातून मोबाईल चोरी
ठाणे : वर्तकनगर येथील छोटी महावीर भुईया (वय ३३) हे ठाणे रेल्वे स्थानकावर मित्राला भेटण्यासाठी आले होते. त्या वेळी फलाट क्रमांक २ येथील उद्‍वाहनाजवळ बसले होते. बसल्या जागी झोप लागताच चोरट्याने त्यांच्या पॅंटच्या खिशातील २३ हजार ९९९ रुपये किमतीचे दोन मोबाईल फोन घेऊन पोबारा केला. हा प्रकार १६ डिसेंबर २०२५ रोजी रात्री घडला. याप्रकरणी ठाणे लोहमार्ग पोलिस ठाण्यात गुन्हा दाखल झाला आहे.

मुंब्र्यात वीजवाहिनीला आग
ठाणे : मुंब्रा, शंकर मंदिरजवळील टोरंट पॉवरच्या केबलला किरकोळ आग लागल्याची घटना बुधवारी (ता. १७) सकाळी १० वाजण्याच्या सुमारास घडली. या घटनेत सुदैवाने कोणालाही दुखापत झाली नसून या आगीवर १५ मिनिटांत नियंत्रण मिळविण्यात अग्निशमन दलाच्या जवानांना यश आल्याची माहिती ठाणे महापालिका आपत्ती व्यवस्थापन कक्षेने दिली.