शिवसेना, मनसे आणि काँग्रेसची हितेंद्र ठाकूर यांच्याबरोबर बंद दाराआड चर्चा

बविआ, मविआ युतीचे संकेत
वसई-विरारमध्ये नवी समीकरणे; हितेंद्र ठाकूर यांच्याबरोबर बंद दाराआड चर्चा
विरार, ता. १८ (बातमीदार) : वसई-विरार महानगरपालिकेच्या आगामी निवडणुकीसाठी राजकीय वातावरण तापू लागले असून, बहुजन विकास आघाडी (बविआ) आणि महाविकास आघाडीमध्ये (मविआ) युती होण्याची दाट शक्यता निर्माण झाली आहे. या संदर्भात शिवसेना (ठाकरे गट), महाराष्ट्र नवनिर्माण सेना (मनसे) आणि काँग्रेसच्या प्रमुख नेत्यांनी हितेंद्र ठाकूर यांची भेट घेऊन बंद दाराआड चर्चा केली आहे.
शिवसेनेचे विलास पोतनीस आणि अमोल कीर्तिकर यांनी मंगळवारी (ता. १६) ठाकूर यांची भेट घेतली. त्यानंतर बुधवारी (ता. १७) मनसेचे अविनाश जाधव, काँग्रेसचे विजय पाटील आणि जिल्हाध्यक्ष अनिल अल्मेडा यांनीही ठाकूर यांच्यासोबत चर्चा केली. नालासोपाऱ्यात शिवसेना (शिंदे गट) आणि भाजप युतीच्या घोषणेनंतर त्यांना रोखण्यासाठी बविआ आणि मविआची बोलणी अंतिम टप्प्यात असल्याचे समजते. यापूर्वी नगरपरिषद आणि जिल्हा परिषद निवडणुकांमध्ये बविआ आणि मविआने एकत्र काम केले आहे. तोच पॅटर्न आता महापालिकेतही राबवण्याचे संकेत मिळत आहेत.
जर ही युती आकाराला आली, तर वसई-विरारमधील ताकद पाहता बविआच या युतीत ''मोठा भाऊ'' असणार हे निश्चित मानले जात आहे. येत्या दोन दिवसांत या संभाव्य युतीबाबत अधिकृत घोषणा होण्याची शक्यता असून, यामुळे महापालिका निवडणुकीत मोठी चुरस पाहायला मिळणार आहे.