अनंत राऊत यांच्या कवितांनी रसिक मंत्रमुग्ध

अनंत राऊत यांच्या कवितांनी रसिक मंत्रमुग्ध
अलिबाग, ता. १८ : कोलाड येथील तटकरे चॅरिटेबल ट्रस्ट संचलित डॉ. श्री. नानासाहेब धर्माधिकारी कॉलेज, गोवे-कोलाड येथे वार्षिक सांस्कृतिक व क्रीडा महोत्सव ‘उत्कर्ष’चा भव्यदिव्य प्रारंभ उत्साहात झाला. संस्थेचे सचिव संदीप तटकरे यांच्या मार्गदर्शनाखाली आयोजित करण्यात आलेल्या या महोत्सवाचे उद्घाटन प्रसिद्ध कवी अनंत राऊत यांच्या हस्ते करण्यात आले.
उद्घाटन समारंभास व्यासपीठावर उद्घाटक कवी अनंत राऊत, संस्थेचे सचिव संदीप तटकरे, रजिस्ट्रार अजित तेलंगे, कोलाड विभाग शिक्षण प्रसारक मंडळाचे सचिव प्रकाश सर्कले, एमडीएन इंटरनॅशनल स्कूलचे संचालक देवेंद्र चांदगावकर, श्रीमती गीता द. तटकरे पॉलिटेक्निक कॉलेजचे प्राचार्य विपुल मसाल, आयटीआयचे प्राचार्य संजय हजारे, एमडीएन स्कूलच्या प्राचार्य सौ. योगिनी देशमुख, ग. द. तटकरे स्कूलचे प्राचार्य संतोषकुमार भालेराव, प्राचार्य डॉ. विश्वास देशमुख, उपप्राचार्य नेहल प्रधान, कार्यालयीन अधीक्षक अमोल गोलीपकर तसेच विविध विभागांचे विभागप्रमुख व प्राध्यापक उपस्थित होते. कार्यक्रमाची सुरुवात माय भवानी मंदिर ते कॉलेज अशी भव्य बाइक रॅली काढून करण्यात आली. प्रमुख मार्गदर्शनात कवी अनंत राऊत यांनी आपल्या विविध कवितांच्या माध्यमातून तब्बल दोन तास उपस्थितांना मंत्रमुग्ध केले.