गडब येथे तंबाखूमुक्त अभियान

गडब येथे तंबाखूमुक्त अभियान
वडखळ ता. १८ (बातमीदार) : पेण तालुक्यातील जनता हायस्कूल व कॉलेज येथे विद्यार्थ्यांसाठी तंबाखूमुक्त अभियानांतर्गत निबंध व चित्रकला स्पर्धा तसेच बाल गुन्हेगारी कायदे संरक्षणाविषयी माहिती शिबिर यशस्वीरीत्या पार पडले. या कार्यक्रमात जिल्हा शासकीय रुग्णालयाचे समुपदेशक सुशील साईकर यांनी विद्यार्थ्यांना तंबाखू, विडी, सिगारेट, ड्रग्ज यांसारख्या व्यसनांपासून दूर राहण्याचा सल्ला दिला. ‘या व्यसनांची कधीही नशा चाखू नका; अन्यथा जीवनाचा सर्वनाश होऊ शकतो,’ असे स्पष्ट मत त्यांनी मांडले.
यानंतर पेण येथील बाल विधी संघर्ष न्यायालयातर्फे ॲड. भक्ती पाटील, ॲड. सतीश पाटील व ॲड. वीणा चव्हाण यांनी बाल गुन्हेगारी, बालहक्क व कायदे संरक्षण याविषयी सविस्तर माहिती दिली. त्यांनी कायद्याची भूमिका, मुलांचे हक्क व जबाबदाऱ्या यांचे सोप्या भाषेत स्पष्टीकरण केले. कार्यक्रमात मुख्याध्यापक ई. एम. सोनावणे यांनीही विद्यार्थ्यांना मार्गदर्शन करताना युवा अवस्थेत काय करावे व काय करू नये याबाबत योग्य दिशा दिली. याचवेळी तंबाखूमुक्त अभियानांतर्गत घेण्यात आलेल्या निबंध व चित्रकला स्पर्धेतील विजेत्यांना शालेय साहित्य देऊन गौरविण्यात आले.
या कार्यक्रमास आदर्श युवा संघटनाचे सचिव कमलेश ठाकूर यांच्यासह अंकुश वाघमारे, मनाली नाईक, एस. बी. नेवरे, आर. पाटील आदी मान्यवर उपस्थित होते. शेकडो विद्यार्थ्यांच्या उपस्थितीत कार्यक्रम उत्साहात संपन्न झाला.