ठाण्यात ‘डॉक्टर तुमच्या भेटीला’ कार्यक्रमाचे आयोजन

ठाण्यात ‘डॉक्टर तुमच्या भेटीला’ कार्यक्रमाचे आयोजन
ठाणे, ता. १८ ः वाढत्या वयानुसार निर्माण होणाऱ्या शारीरिक आणि मानसिक समस्यांवर मात कशी करावी, या विषयावर मार्गदर्शन करण्यासाठी ‘डॉक्टर तुमच्या भेटीला’ या विनामूल्य कार्यक्रमाचे आयोजन करण्यात आले आहे. ज्येष्ठ नागरिकांसाठी अत्यंत उपयुक्त ठरणारा हा कार्यक्रम रविवारी (ता. २१) सकाळी ठाण्यातील सहयोग मंदिर येथे पार पडणार आहे. ज्येष्ठ नागरिकांनी वयाशी सामना कसा करावा? हा विषय असून प्रसिद्ध जनरल फिजिशियन आणि ज्येष्ठांचे विशेष तज्ज्ञ डॉ. सारंग आपटे या कार्यक्रमात प्रमुख मार्गदर्शक म्हणून उपस्थित राहणार आहेत. ज्येष्ठ नागरिकांनी आरोग्याची काळजी कशी घ्यावी, वयोमानानुसार होणारे बदल आनंदाने कसे स्वीकारावे आणि दीर्घायुष्यासाठी जीवनशैलीत कोणते बदल करावेत, यावर डॉ. आपटे सविस्तर भाष्य करणार आहेत. केवळ व्याख्यान न राहता हा कार्यक्रम श्रोत्यांसाठी संवादपर असणार आहे. डॉ. आपटे यांच्या मार्गदर्शनानंतर उपस्थित नागरिकांच्या शंकांचे निरसन करण्यासाठी प्रश्नोत्तरांचे खास सत्र आयोजित करण्यात आले आहे. यामध्ये ज्येष्ठ नागरिक आपल्या आरोग्यविषयक समस्यांबद्दल थेट डॉक्टरांशी संवाद साधू शकतील.