सततचा सुका–ओला दुष्काळ आणि वाढता खर्च : हमीभाव वाढवून देण्याची कुणबी सेनेची मागणी

भातपिकाला हमीभाव वाढवून देण्याची कुणबी सेनेची मागणी
विक्रमगड, ता. १८ (बातमीदार) : सततचा सुका-ओला दुष्काळ, अवकाळी पाऊस आणि शेतीकामांच्या वाढत्या खर्चामुळे भातशेती पूर्णपणे तोट्यात चालली आहे. या पार्श्वभूमीवर, भातशेती आणि शेतकरी वाचवण्यासाठी केंद्र व राज्य सरकारने भातपिकाला प्रति क्विंटल किमान चार हजार रुपये हमीभाव द्यावा, अशी ठाम मागणी कुणबी सेनेचे प्रमुख विश्वनाथ पाटील यांनी केली आहे.
सध्या बियाणे, खते, कीटकनाशके आणि मजुरीच्या दरात मोठी वाढ झाली आहे; मात्र त्या तुलनेत भाताला मिळणारा सरकारी भाव अत्यंत कमी आहे. जर शासनाने तातडीने हमीभाव वाढवला नाही, तर शेतकरी भातशेतीपासून कायमचा दुरावेल आणि ग्रामीण अर्थव्यवस्था कोलमडेल, अशी भीती पाटील यांनी व्यक्त केली आहे.
हमीभाव वाढवण्यासोबतच पीकविमा, सिंचन सुविधा आणि वेळेवर शासकीय खरेदी सुरू करावी, अशी मागणीही शेतकऱ्यांकडून होत आहे. या मागणीला विविध शेतकरी संघटनांनीही पाठिंबा दर्शविला असून, सरकारने सकारात्मक निर्णय न घेतल्यास भातशेती संस्कृती नामशेष होण्याचा इशारा देण्यात आला आहे.