अनधिकृत भंगार गोदामाच्या आगप्रकरणी गुन्हा दाखल

अनधिकृत भंगार गोदामप्रकरणी गुन्हा दाखल

पालघर, ता. १८ (बातमीदार) ः पालघर पूर्व येथील पूनम पार्क परिसरात गुरुवारी (ता. ११) मध्यरात्रीच्या सुमारास अभिनव शाळेजवळ असलेल्या एका अनधिकृत भंगार गोदामाला आग लागल्याची घटना घडली होती. या प्रकरणात पालघर पोलिसांनी गोदाम चालविणारा आणि तेथे अवैध भंगार ठेवणारा शमशेर खान याच्याविरुद्ध गुन्हा दाखल केला आहे.
भंगार गोदामाच्या आजूबाजूच्या परिसरात कोणतीही सुरक्षितता न बाळगता उघड्यावर कलरचे डबे व ज्वलनशील पदार्थांचा बेकायदेशीर साठा करण्यात आला होता. हा साठा गोदामचालक शमशेर मोहम्मद खान उर्फ पापावर याने ठेवल्याचे पोलिस तपासात निष्पन्न झाले. त्याच्या निष्काळजीमुळे मानवी जीवनास धोका निर्माण होण्याची शक्यता असल्याने खानविरुद्ध भा.दं.वि. कलम २८७ अंतर्गत गुन्हा दाखल करण्यात आला. या प्रकरणाचा पुढील तपास पोलिस उपनिरीक्षक प्रकाश पाटील करत आहेत.