अखेर १५ दिवसांनंतर पाणी पुरवठा सुरू

अखेर १५ दिवसांनंतर पाणीपुरवठा सुरू
सकाळ वृत्तसेवा
ठाणे, ता. १८ : मागील १० ते १५ दिवसांपासून पिसे योजनेतून शहराला पाणीपुरवठा करणाऱ्या जलवाहिनीच्या दुरुस्तीचे काम बुधवारी (ता. १७) रात्री पूर्ण झाल्यानंतर गुरुवारी सकाळपासून शहराचा पाणीपुरवठा पूर्ववत करण्यात आला. त्यामुळे ठाणेकरांना पाणी दिलासा मिळाला आहे; मात्र शहरात लागू केलेल्या ५० टक्के कपातीमुळे वेळापत्रक कोलमडले आहे.

पिसे बंधारा योथून टेमघर जलशुद्धीकरण केंद्राकडे पाणी वाहून नेणारी एक हजार मिमी व्यासाची जलवाहिनी १० दिवसांमध्ये दुसऱ्यांदा फुटली आहे. त्यामुळे आधी ३० टक्के, तर नंतर ५० टक्के पाणीकपात ठाणे महापालिकेकडून लागू करण्यात आली आहे. या कालावधीत पालिकेने टँकरद्वारे काही ठिकाणी पाणीपुरवठा केला होता. याचदरम्यान, जलवाहिनीच्या दुरुस्तीचे काम दिवसरात्र पालिकेच्या पथकाकडून सुरू होते. जलवाहिनीच्या दुरुस्तीचे काम बुधवारी रात्री पूर्ण झाल्यानंतर गुरुवारी सकाळपासून शहराचा पाणीपुरवठा पूर्ववत करण्यात आला, परंतु या जलवाहिनीच्या दुरुस्ती कामामुळे गेले १५ दिवस पाणीपुरवठ्याचे वेळापत्रक कोलमडले आहे. अनेक संकुलांच्या टाक्या रिकाम्या आहेत. पालिकेच्या पाणी साठवणूक टाक्या रिकाम्या आहेत, त्या भरून पाणीपुरवठ्याचे वेळापत्रक पुन्हा रुळावर येण्यासाठी आणखी दोन दिवस लागण्याची शक्यता आहे, अशी माहिती पालिका प्रशासनाने दिली.