शहापूरात उधारीवरून वाद; खून करून मृतदेह ओढ्यात फेकणाऱ्यास अटक

शहापुरात उधारीवरून वाद
हत्या करून मृतदेह ओढ्यात फेकणाऱ्या आरोपीस अटक

सकाळ वृत्तसेवा
ठाणे, ता. १८ : उधारीवर किराणा न दिल्याच्या कारणावरून झालेल्या वादातून एकाची हत्या केल्याची घटना काही दिवसांपूर्वी शहापुरात घडली. दुकानदार विठ्ठल रतन पारधी (३६) याने कोथळा (शहापूर) येथील बाळू नामा वीर (४५) यांची वादातून हत्या केल्याचा प्रकार समोर आला आहे. हत्या केल्यानंतर अटकेतील दुकानदार पारधी याने वीर यांचा मृतदेह पाण्याच्या ओढ्यात टाकून पुरावा नष्ट करण्याचा प्रयत्न केला. त्या खुनाचा उलगडा करण्यात स्थानिक गुन्हे शाखा, ठाणे ग्रामीण व शहापूर पोलिस ठाण्याच्या पथकाला सोमवारी (ता. ५) यश आले.
शहापूर, खरमेपाडा परिसरातील शेताजवळील ओढ्यात कुजलेल्या अवस्थेत एका इसमाचा मृतदेह रविवारी (ता. ७) दुपारी १२.३० च्या सुमारास आढळून आला. प्राथमिक चौकशीत मृतदेहाची ओळखही पटली. याप्रकरणी शहापूर पोलिस ठाण्यात गुन्हा दाखल करण्यात आला असून, ठाणे ग्रामीण पोलिस अधीक्षक डॉ. डी. एस. स्वामी व अपर पोलिस अधीक्षक अनमोल मित्तल यांनी घटनास्थळी भेट देत समांतर तपासाचे आदेश दिले.
त्यानुसार स्थानिक गुन्हे शाखेचे वरिष्ठ पोलिस निरीक्षक संदीप गिते व शहापूर पोलिस ठाण्याचे निरीक्षक मुकेश ढगे यांच्या मार्गदर्शनाखाली पथके तयार करण्यात आली. तपासादरम्यान विठ्ठल पारधी यानेच हा खून केल्याचे निष्पन्न झाले. किराणा उधारीवर न दिल्याने मयत वीर यांनी आरोपी व त्याच्या पत्नीशी शिवीगाळ केली. त्यातून आरोपीने वीर यांच्या डोक्यात फटका मारला. त्यामध्ये वीर यांचा जागीच मृत्यू झाला. त्यानंतर त्यांचा मृतदेह ओढ्यात टाकून त्यावर दगड ठेवून पुरावा नष्ट करण्याचा प्रयत्न केल्याची कबुली पारधी यांनी दिली. अटकेतील आरोपीला शुक्रवार (ता. १९) पर्यंत पोलिस कोठडीत ठेवण्याचे आदेश न्यायालयाने दिल्याची माहिती तपास अधिकारी ढगे यांनी दिली.