वेळप्रसंगी पदाचा राजीनामा देऊन घरी बसू भाजपचे १८ मंडळ अध्यक्ष आक्रमक

वेळप्रसंगी पदाचा राजीनामा देऊन घरी बसू
भाजपचे १८ मंडल अध्यक्ष आक्रमक भूमिकेत

सकाळ वृत्तसेवा
ठाणे, ता. १८ : ठाण्यातील भाजपच्या १८ मंडल अध्यक्षांनी निवेदनाद्वारे आमदार संजय केळकर, शहर अध्यक्ष संदीप लेले यांना युती न करण्याची मागणी केली आहे. जर युती झाली, तर आम्ही शिंदे सेनेचे काम करणार नाही, वेळप्रसंगी पदाचा राजीनामा देऊन घरी बसू, असा इशाराही या वेळी देण्यात आला आहे. स्वबळावर लढल्यास पक्षाला वाढण्यास पोषक वातावरण मिळणार आहे. त्यात संधी मिळाली नाही, तर आधीच आमची चार वर्षे वाया गेली आहेत, त्यात आणखी पाच वर्षे वाया जाणार आहेत. त्यामुळे युती न करता स्वबळावर लढावे, अशी मागणी या वेळी करण्यात आली आहे.
ठाणे, कल्याण डोंबिवली, नवी मुंबई शहरात भाजप व शिंदेंच्या सेनेत गेल्या अनेक महिन्यांपासून धुसफूस सुरू होती. यामुळे आगामी पालिका निवडणुकीत दोन्ही पक्ष स्वबळावर लढतील, अशी अपेक्षा कार्यकर्त्यांकडून व्यक्त करण्यात येत होती. त्यामुळे भाजपसह शिंदे सेनेतील अनेक पदाधिकाऱ्यांनी प्रभाग बांधण्यास सुरुवात केली. त्यातच वरिष्ठ पातळीवर युतीबाबत एकमत होऊन पालिका निवडणूक युती म्हणून लढविण्याची घोषणा केली. त्यानंतर ठाणे भाजपच्या स्थानिक कार्यकर्त्यांमध्ये असंतोषाचे सूर उमटू लागले आहेत.

दरम्यान, वनमंत्री गणेश नाईक यांच्या जनता दरबारातून, आमदार संजय केळकर व आमदार निरंजन डावखरे यांच्या ‘जनसेवकाचा जनसंवाद’ उपक्रमातून नागरिकांच्या समस्या सोडविण्यात आल्याचे कार्यकर्त्यांनी अधोरेखित केले आहे. महापालिकेतील माजी भाजप नगरसेवकांनी आपापल्या प्रभागांत आपली पकड अधिक मजबूत केली असून, ज्या प्रभागांत भाजपचा प्रतिनिधी नव्हता, त्या ठिकाणीही कार्यकर्त्यांनी शासनाच्या योजना प्रभावीपणे पोहोचवल्या आहेत. त्यामुळे अशा भागांतही भाजपविषयी विश्वास निर्माण झाल्याचे मत व्यक्त करत युती न करण्याची मागणी करण्यात आली आहे.
..................................
ठाणे शहरातील १८ मंडल अध्यक्षांनी एकमताने युतीबाबतचा निर्णय पुनर्विचारात घ्यावा, अशी मागणी केली असून, यामुळे कार्यकर्त्यांचा आत्मविश्वास वाढेल आणि पक्षाची दीर्घकालीन वाढ सुनिश्चित होईल, असा विश्वास त्यांनी व्यक्त केला आहे. ही भूमिका कोणत्याही पक्षाच्या विरोधात नसून, केवळ भाजप अधिक सक्षम व्हावा आणि ‘गल्ली ते दिल्ली’ पक्षाची ताकद वाढावी, या व्यापक उद्देशाने घेतल्याचे स्पष्ट करण्यात आले आहे.