शांतीवन आश्रमातील विद्यार्थ्यांना वस्तूंचे वाटप

शांतीवन आश्रमातील विद्यार्थ्यांना वस्तूंचे वाटप
मुरूड, ता. १८ (बातमीदार)ः जिंदल विद्यामंदिर, साळाव यांच्या वतीने सामाजिक सेवा जबाबदारी उपक्रमांतर्गत मुरूड तालुक्यातील कोर्लई येथील शांतीवन आश्रम येथे भेट देऊन आश्रमातील विद्यार्थ्यांना खाण्याचे पदार्थ, किराणा सामान व दैनंदिन वापराच्या आवश्यक वस्तूंचे वाटप करण्यात आले. या उपक्रमात विभाग प्रभारी स्वाती पाटील व एलिझाबेथ झीना यांच्या मार्गदर्शनाखाली दहा विद्यार्थ्यांनी सहभाग घेतला.
अनाथाश्रमासाठी राबविण्यात आलेल्या या अर्थपूर्ण उपक्रमातून विद्यार्थ्यांनी संवेदनशीलता, करुणा व सामाजिक बांधिलकीचे उत्तम उदाहरण समाजासमोर ठेवले. समाजातील वास्तव परिस्थितीची जाणीव होऊन वंचितांप्रती कर्तव्यभावना दृढ करण्यास हा उपक्रम प्रेरक ठरेल, असे मत व्यक्त करण्यात आले.
या उपक्रमाला शाळेचे प्राचार्य मुकेश ठाकूर यांचे मार्गदर्शन लाभले. तसेच शाळा व्यवस्थापन समितीचे अध्यक्ष पंकज मलिक यांनी शाळा, शिक्षकवृंद व विद्यार्थ्यांच्या या स्तुत्य कार्याचे कौतुक करून सामाजिक योगदानाबद्दल विशेष अभिनंदन केले.
-----------------------------------------------
अल्पसंख्याक दिनानिमित्त मोफत आरोग्य शिबिर
मुरूड, ता. १८ (बातमीदार) ः अल्पसंख्याक दिनाचे औचित्य साधून तसेच डॉ. द्वारकानाथ वामन कर्णिक यांच्या स्मृतिदिनानिमित्त अंजुमन इस्लाम जंजिरा डिग्री कॉलेज ऑफ सायन्स येथे मोफत आरोग्य तपासणी, नेत्र व मोतीबिंदू तपासणी तसेच रक्तदान महाशिबिराचे आयोजन करण्यात आले. हे शिबिर प्राचार्य डॉ. साजिद शेख यांच्या मार्गदर्शनाखाली लायन्स क्लब ऑफ मुरूड-जंजिरा आणि लायन्स क्लब ऑफ श्रीबाग यांच्या संयुक्त विद्यमाने पार पडले.
कार्यक्रमास महाविद्यालयाचे चेअरमन जैनुद्दीन कादरी, सदस्य इस्माईल शेख व तौसिफ फत्ते, लायन्स इंटरनॅशनल रायगडचे जिल्हा गव्हर्नर ला. संजीव सूर्यवंशी यांच्यासह अनेक मान्यवर उपस्थित होते. सर्व उपस्थितांनी अल्पसंख्याक दिनाच्या शुभेच्छा देत सामाजिक सलोखा व सेवाभावावर आपले विचार मांडले.
या महाशिबिरासाठी तेरणा स्पेशालिटी हॉस्पिटल अँड रिसर्च सेंटर, जिल्हा रुग्णालयाची रक्तपेढी तसेच तज्ज्ञ डॉक्टर व त्यांच्या पथकांचे विशेष सहकार्य लाभले. शिबिरात १,२०१ नागरिकांची नेत्र तपासणी, १०० नागरिकांची सर्वसाधारण आरोग्य तपासणी करण्यात आली, तर ६२ रक्तदात्यांनी रक्तदान करून सामाजिक बांधिलकी जपली.
या उपक्रमास परिसरातील नागरिकांचा उत्स्फूर्त प्रतिसाद लाभला. कार्यक्रमाच्या यशस्वी आयोजनासाठी राष्ट्रीय सेवा योजना कार्यक्रम अधिकारी डॉ. फिरोज शेख यांनी विशेष सहकार्य केले.