मुरबाडमधील ठुणे येथील पुल कोसळला!

ठुणे येथील पूल कोसळला
मुरबाडमधील अनेक गावांचा संपर्क तुटला

मुरबाड, ता. १९ (वार्ताहर) : तालुक्यातील नांदगाव-पाडाळे रस्त्यावरील बांदलपाडा ठुणेदरम्यान असलेल्या डोईफोडी नदीवरील जुना जीर्ण झालेला दगडी पूल कोसळला असून, या परिसरातील वाहतूक ठप्प होऊन अनेक गावांचा संपर्क तुटला आहे. ही घटना शुक्रवारी (ता. १९) पहाटे ३ वाजता घडली.

अनेक वर्षांपासून या नवीन पूल उभारण्याची मागणी ठूणे-पाडाळे येथील नागरिक करत होते; परंतु ढिम्म प्रशासन व लोकप्रतिनिधीची उदासीनतेमुळे हा पूल होऊ शकला नसल्याने अखेर शुक्रवारी पहाटे ३ वाजता मध्यभागी कोसळला आणि या पुलाचे दोन भाग झाले. यामुळे ठूणे, पाडाळे, कोळोशी, अशा १४ गावांचा संपर्क तुटला असून, शालेय विद्यार्थी, ज्येष्ठ नागरिक, रुग्ण तसेच कामगारवर्गाची मोठी कोंडी झाल्याचे स्थानिक ग्रामस्थांनी सांगितले. दरम्यान, या घटनेमुळे तालुक्यातील हेदवली, चासोळे, न्याहाडी येथील जुन्या पुलांचा प्रश्न ऐरणीवर आला असून, प्रशासनाने आतातरी लक्ष द्यावे, अशी मागणी नागरिकांनी केली आहे.

गेले चार वर्षे नवीन पुलाच्या मागणीसाठी आम्ही प्रशासनाकडे पाठपुरावा करत होतो; परंतु प्रशासनाने कोणतीही दखल घेतली गेली नसल्याने शेवटी आज पूल कोसळला असून, परिसरातील नागरिकांना याचा मोठा त्रास होणार आहे, आतातरी शासनाने लक्ष द्यावे
- ज्ञानेश्वर मुरबाडे, ग्रामस्थ, ठूणे

आराखड्यात मंजूर होऊनही या पुलासाठी गेली तीन वर्षे निधी प्राप्त झाला नसल्याने नवीन पूल बांधता आला नाही, परंतु आमदार किसन कथोरे यांच्या निधीतून नवीन पुलाच्या बांधकामाला सुरुवात केली जाईल.
- स्वरा चौधरी, माजी सभापती, पंचायत समिती मुरबाड

तालुक्यातील सर्वच जुन्या पुलांचे ऑडिट होणे गरजेचे आहे; परंतु अधिकारीवर्ग सुस्त झाले आहेत. सार्वजनिक बांधकाम विभागाचे मुख्य कार्यकारी अभियंता ठाणे कार्यालयातही उपस्थित राहत नाहीत.
- सुभाष घरत, माजी सदस्य, जिल्हा परिषद