मोठागाव रेल्वे फाटक वाहतुकीसाठी बंद

मोठागाव रेल्वे फाटक वाहतुकीसाठी बंद

सकाळ वृत्तसेवा
डोंबिवली, ता. १९ : मोठागाव रेतीबंदर रेल्वे फाटक समर्पित जलदगती मालवाहू रेल्वेमार्गाच्या कामासाठी शुक्रवार ते रविवारदरम्यान मध्यरात्री १२ ते सकाळी ६ वाजेपर्यंत वाहतुकीसाठी बंद राहणार आहे. परिणामी वाहनचालकांनी पर्यायी मार्गांचा वापर करण्याचे आवाहन वाहतूक विभागाकडून करण्यात आले आहे.

वाहतूक विभागाचे पोलिस उपायुक्त पंकज शिरसाट यांनी यासंदर्भात अधिसूचना जारी केली आहे. दिल्ली ते जेएनपीए समर्पित जलदगती मालवाहू रेल्वेमार्गाचे काम वेगाने सुरू असून, या मार्गात मोठागाव रेतीबंदर रेल्वे फाटकासाठीचे काम हाती घेण्यात आले आहे. डोंबिवली शहरातून मुंबई, ठाणे व भिवंडीला जाण्यासाठी मोठागाव रेल्वे फाटकाचा मोठ्या प्रमाणावर वापर होत असल्याने हा मार्ग नेहमीच गजबजलेला असतो. टाटा प्रोजेक्ट्स लिमिटेडकडून समर्पित जलद गती मालवाहू रेल्वे मार्गिकेसाठी शुक्रवारपासून सुरू होणाऱ्या कामामुळे रेल्वे फाटक बंद राहणार आहे. यामध्ये माणकोली पुलावरून रेतीबंदर रेल्वे फाटकाकडे येणाऱ्या वाहनांना नवीन कोपर छेद रस्त्यावरील जलकुंभ भागात प्रवेश बंद करण्यात आला आहे. ही वाहने उजवे वळण घेऊन नवीन कोपर वळण रस्त्याने जातील. तसेच डोंबिवलीतून रेल्वे फाटकाकडे जाणाऱ्या वाहनांना रेतीबंदर चौकात प्रवेश बंद करण्यात आला असून, ही वाहने कोपर रस्ता, डोंबिवली पुलाखालून नवीन कोपर रस्त्याने माणकोली पुलाकडे वळविण्यात येणार आहेत.