बिबट्या शिरल्याने ‘पारिजात’मध्ये थरार
भाईंदर, ता. १९ (बातमीदार) : बिबट्या पारिजात इमारतीत सकाळी ७.३० वाजण्याच्या सुमारास शिरला. येथे एकामागोमाग अनेकांना त्याने जखमी केले. पोलिस, अग्निशमन दल व वनविभाग यांनी प्रयत्नांची पराकाष्ठा करून रहिवाशांना वाचवले आणि बिबट्याला जेरबंद केले.
मिळालेल्या माहितीनुसार, बिबट्या शिरल्याचे समजताच इमारतीत राहणारे दीपू भौमिक सुरक्षेसाठी म्हणून घराबाहेरील मोकळ्या जागेतील लोखंडी जाळी लावण्यासाठी बाहेर पडले. जाळी लावत असतानाच बिबट्याने त्यांच्यावर हल्ला केला. मोठ्या प्रयत्नाने त्यांनी जाळी लावली. त्यामुळे ते वाचले; मात्र बिबट्याने त्यांच्या हाताला ओरबाडले. याच इमारतीत राहणारे राकेश यादव व शामप्रसाद सहानी चहा पिऊन घरी परतत होते. जिन्यातच बिबट्याने त्यांच्यावर हल्ला केला. दोघेही पळून जाण्यात यशस्वी ठरले; मात्र तोपर्यंत त्यांना जखमा झाल्या होत्या. नंतर बिबट्याने टाक कुटुंबाच्या घराकडे मोर्चा वळवला. टाक यांच्या घराचा एक दरवाजा मोकळ्या गच्चीकडे उघडा होता. या दरवाजातून तो घरात शिरला. त्या वेळी घरात भारती टाक व त्यांची मुलगी खुशी होती. त्यांच्यावर बिबट्याने हल्ला चढवला. भारती यांच्या गळ्यावर व खुशी यांच्या पायावर जखमा झाल्या; मात्र त्या घराबाहेर पळून गेल्या. या वेळी घरात दुसरी मुलगी अंजली झोपलेली होती. ती जागी होताच बिबट्याने तिच्यावर हल्ला केला. तिने जोरदार प्रतिकार केला. त्यात तिच्या चेहऱ्यावर मोठ्या प्रमाणात जखमा झाल्याने ती रक्तबंबाळ झाली; मात्र त्यानंतर अग्निशमन दलाने तिला वाचवले. स्वयंपाकघरात लपलेल्या बिबट्याला वनविभागाच्या अधिकाऱ्यांनी पहिले गुंगीचे इंजेक्शन मारले; मात्र ते अपयशी ठरले. बिबट्या पुन्हा लपून बसला. त्यामुळे अधिकाऱ्यांनी खिडकीवाटे कॅमेरा आत सोडला व बिबट्याचा अंदाज घेतला व दुसरे इंजेक्शन त्याच्या दिशेने सोडले. या वेळी इंजेक्शन बरोबर बसले. बिबट्या पूर्ण बेशुद्ध झाल्यानंतर सुमारे ३ वाजण्याच्या सुमारास त्याला बाहेर काढले. या संपूर्ण काळात परिसरातील लोकांनी हे नाट्य पाहण्यासाठी प्रचंड गर्दी केली. सर्व जण आपल्या मोबाईलमध्ये हा प्रसंग कैद करण्याचा प्रयत्न करत होते; त्यामुळे अग्निशमन दल व वनविभागाला आपले काम करण्यात प्रचंड अडचण येत होती. परिवहनमंत्री प्रताप सरनाईक, आमदार नरेंद्र मेहता, महापालिका आयुक्त राधाबिनोद शर्मा, तसेच पोलिस अधिकारी घटनास्थळी ठाण मांडून बसले होते.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.