कायद्याचे उल्लंघन करणाऱ्यांवर तत्काळ कारवाई करा!

कायद्याचे उल्लंघन करणाऱ्यांवर तत्काळ कारवाई करा!
आमदार पराग शहा यांचा इशारा

घाटकोपर, ता. १९ (बातमीदार) ः घाटकोपर पूर्व परिसरातील वाढते अनधिकृत फेरीवाले आणि वाहतुकीच्या नियमांचे सर्रास उल्लंघन याविरोधात आमदार पराग शहा आज आक्रमक भूमिकेत दिसले. कायद्याचे उल्लंघन करणाऱ्यांवर तत्काळ कारवाई करा; अन्यथा रस्त्यावर उतरून आंदोलन छेडले जाईल, असा इशारा त्यांनी दिला.
नागरिकांना होणाऱ्या त्रासाला कंटाळून त्यांनी थेट रस्त्यावर उतरून वाहतूक पोलिस व महापालिका अधिकाऱ्यांना जाब विचारला. घाटकोपर पूर्वेतील वल्लभबाग लेन, खाऊ गल्ली रोड आणि एम. जी. रोड या प्रमुख मार्गांवर अनधिकृत फेरीवाल्यांनी पदपथांसह रस्त्यावर बस्तान मांडल्याने वाहतुकीस मोठा अडथळा निर्माण होत आहे. याचा फटका वाहनचालकांसह पादचाऱ्यांनाही सहन करावा लागत आहे. तसेच अनेक ठिकाणी वाहतुकीचे नियम मोडून चुकीच्या मार्गाने वाहतूक वळवली जात असल्याचेही निदर्शनास आल्याने पराग शहा यांनी तीव्र नाराजी व्यक्त केली. ‘पोलिस व पालिका प्रशासनाने सातत्याने कारवाई केली पाहिजे. दुकानदारांनीही फुटपाथवर खुर्च्या, बाकडे ठेवून अतिक्रमण करू नये. कायद्याचे उल्लंघन खपवून घेतले जाणार नाही,’ असा ठाम इशारा त्यांनी दिला.